Ақын Қасым Аманжоловтың қызы өмірден өтті

Ақын Қасым Аманжоловтың қызы Дариға Қасымқызы Аманжолова өмірден озды. Бұл туралы KAZ.NUR.KZ Қарқаралы ауданы әкідігіне сілтеме жасап хабарлайды.

"Дауылпаз ақын Қасым Аманжоловтың қызы Дариға Қасымқызы Аманжолова 78 жасында өмірден озды. Әкесі Қасым Аманжоловтың әдебиеттегі ізін жалғастырып, прозалық шығармалар жазған көрнекті қаламгер, музыкалық аспаптарда шебер ойнаған әнші, сазгер.

Дариға Қасымқызы өмірінің соңына дейін асыл әкеден қалған шығармашылық мұраларды көздің қарашығындай сақтаған, әке аманатына адал аяулы жан еді.

Марқұмның иманы жолдас болып, рухы пейіште шалқысын!" - делінген әкімдіктің Instagram-дағы парақшасындағы жазбада.

Посмотреть эту публикацию в Instagram

Публикация от Instagram

Дариға Қасымқызы 1946 жылы 4 қарашада Алматы қаласында дүниеге келген. Қазақ Мемлекеттік университетінің "Филология" факультетін тәмәмдаған.

Отыз жылдан астам уақыт бойы Мемлекеттік кітап паласында қажырлы еңбек етті.

Дариға Қасымқызының әріптестері, ақын-жазушылар қауымы да қайғыға ортақтасып, көңіл айтуда.

"Дауылпаз ақын Қасым Аманжоловтың қызы Дариға апамызға уақыт болыпты деген хабар алып отырмыз. Алла панасына алсын апамызды! Жаны жәннаттық болғай!" - деп жазды Ақын Жанат Жаңқашұлы өзінің Facebook-тегі парақшасында.

Кітап ісі басқарма басшысы Алмас Мырзахмет Дариға Қасымқызы жайлы естелігін бөлісті.

"2021 жылы Е.А. Бөкетов атындағы Қарағанды университетінің "Қасымтану" жобасы аясында Жарылғапова Жансая ұстазыма еріп Алматыға барып, шаңырағына түсіп, жасырған құпиясын Жанна апай айтып қойып, жан баласына көрсетпей, жасырып жүрген қолжазбасын қолқалап сұрап ап, теріп, редакциялап, ректор Нұрлан Дулатбеков ағамыздың демеушілігімен кітап етіп шығарып, жабырқап жүрген көңілін бір сейілтіп едік. Иманы саламат болсын!" - делінген естелікте.

KAZ.NUR.KZ ұжымы Дариға Қасымқызының туыстарына қайғырып көңіл айтады.

Мәтіннен қате тапсаңыз, бізге жазыңыз