Астаналық оқушылар күн райының қолайсыздығына байланысты қашықтан оқуға ауысты

Бүгін, 13 ақпанда Астана мектептерінде екінші ауысымда оқитын 0-4 сынып оқушылары қашықтан оқыту форматына ауыстырылады. Бұл туралы қалалық білім басқармасына сілтеме жасаған KAZ.NUR.KZ хабарлайды.

"13 ақпанда күн райының қолайсыздығына байланысты екінші ауысымның 0-4 сынып оқушылары қашықтан оқыту форматына ауыстырылады", - делінген хабарламада.

Бұған дейін Төтенше жағдайлар министрлігі ауа райының нашарлауына байланысты қауіпсіздік шараларын сақтауды сұрағанын хабарлағанбыз.

Сондай-ақ "ҚазАвтоЖол" компаниясы ауа райының қолайсыздығына байланысты "Астана-Петропавл" тас жолының бір бөлігі жабылатынын ескертті.

Нақтырақ айтқанда, 13 ақпан сағат 07:00-де Ақмола облысында ауа райының бұзылуына байланысты "Астана-Петропавл" автожолының 18-232 шақырым аралығындағы учаскесінде (Астана - Щучинск) көліктің барлық түрінің қозғалысына шектеу қойылады.

Жолды 2025 жылғы 13 ақпан сағат 17:00-де ашу жоспарланған.