Раменды үйде пісіреміз: Диана Есенбекова кәріс асханасындағы ең танымал тағам рецебін ұсынды

Кәріс асханасын ұнататын жандар үшін - рамен ең сүйікті әрі жасалуы оңай тағам болатыны анық. Үй жағдайында кәрістердің ұлттық тағамын қалай дайындауға болады? Бүгінгі материалдан білетін боласыздар.

Рамен - кәріс ұлтының негізгі әрі сүйікті тағамдарының бірі. Бүгінгі күні көптеген халық сүйіп жейтін тағамға айналған раменды үйде де жасауға болады. Фудблогер Диана Есенбекова назарларыңызға раменның ең оңай жасалу жолын ұсынады.

Сипаттамасы

Асхана: Корея

Санаты: басты тағам

Дайындалу уақыты: 30 минут

Дайын болу уақыты: 10 минут

Құрамы

Сиыр еті - қалауыңызша

Тұз, қара бұрыш - дәміне қарай

Сұйық май - мөлшеріне қарай

Кәріс рамены - 3 дана

Жұмыртқа - 3

Көк пияз - қалауыңызша

Дайындалуы

1. Етті дайындаймыз

Алдымен етті жақсылап жуып, жұқа етіп турап аламыз. Етті табаққа салып, дәміне қарай тұз, бұрыш қосып, араластырамыз. Сосын қызып тұрған табаға сұйық майды құйып, етті жақсылап қуырып аламыз.

2. Рамен кеспесін пісіреміз

Шұңғыл ыдысқа су құйып, қайнатамыз. Сосын раменнің кеспесін салып, пісіреміз. Соңында раменға арналған дәмдеуіштерді қосамыз.

3. Жұмыртқа мен көк пиязды дайындаймыз

Үш дана жұмыртқаны пісіріп, ортасынан екіге бөліп, тураймыз. Сосын етті жұқалап турап аламыз. Көк пиязды да ұсақтап тураймыз.

4. Раменды дастарханға ұсынамыз

Дайын болған раменнің кеспесін кесеге саламыз. Үстінен сорпасын аздап құямыз. Үстінен жұмыртқа, ет пен көк пиязды саламыз. Осылайша, дәмді әрі ең оңай жасалатын рамен дайын болып шығады.

Мәтіннен қате тапсаңыз, бізге жазыңыз