Қарағанды облысындағы сібір жарасы анықталған екінші адам жансақтау бөліміне ауыстырылды

Қарағанды облысында сібір жарасы диагнозы расталған тағы бір пациенттің жағдайы нашарлап, жансақтау бөліміне ауыстырылған. Бұл туралы Kazinform Қарағанды облысының денсаулық сақтау басқармасына сілтеме жасап хабарлайды.

Қарағанды облысы денсаулық сақтау басқармасының басшысы Бибігүл Төлегенованың айтуынша, бүгінгі таңда сібір жарасы диагнозы расталған екі пациент ем алып жатыр.

"62 жастағы пациентте түйнеменің терідегі түрі тіркелген. Тері-қабыну синдромының күшеюіне және ісіну көлемінің ұлғаюына байланысты реанимация және қарқынды терапия бөліміне ауыстырылды.

Екінші науқас 41 жаста, инфекция орталығының нейробокс бөлімінде жатыр. Жағдайы орташа ауыр. Толық көлемде ем алып жатыр", — дейді Бибігүл Төлегенова.

Естеріңізге сала кетейік, бұған дейін Қарағанды облысындағы Топар кентінде үш адамнан сібір жарасы анықталған болатын. Тағы екі адамды дәрігерлер бақылауына алған еді.

Кейін сібір жарасын жұқтырғандардың бірі көз жұмғаны белгілі болды.