"Орны бөлек тұлғалар": Қауіпті дерт арамыздан алып кеткен танымал адамдар

Елімізде өршіп тұрған қауіпті вирус салдарынан көз жұмғандардың саны бүгінде ресми деректер бойынша 375 адамға жетті. Көптеген отбасы орны толмас қазаға ұшырап, бірінен соң бірі қара жамылып жатты. Аты жаман аурудың құрбандары арасында халқына сыйлы болған танымал тұлғалар да бар деп жазады KAZ.NUR.KZ.

Коронавирус инфекциясы ел игілігі үшін ерен еңбек еткен азаматтарды, мемлекеттік қызметкерлерді, белгілі ғалымдарды, өнер адамдарын да жалмады.

Үшінші шілде күні Ақтау әкімінің орынбасары Гүлжазира Алдашева пневмониядан көз жұмды. Ол 54 жаста болған.

Бесінші шілде күні қазақстандық танымал спорт журналисі және комментатор Диас Омаров өмірден өтті.

Қаралы хабарды жеткізген Қазақстанның спорт баспасөз қызметі қауымдастығының президенті Ілияс Омаровтың айтуынша, Диас Омаровтың өмірден озғандығы тосынан болған.

Бесінші шілдеде қазақстандық кино саласы танымал каскадер актер Мұрат Мұқашевтан айырылды. Ол Алматы ауруханасында пневмониядан көз жұмды.

Жетінші шілде күні белгілі отандық дизайнер Берік Ысмайыловтың қайтыс болғаны туралы хабар келіп түсті. Өнер жұлдыздарын киіндіретін сәнгер індет кезінде арнайы бетперделер тігіп, оларды тегін таратқан еді. Алайда сұм ажал оны да жалмады.

Ертесіне, "Терісқақпай" театрының актері Дархан Дайырбектің қазасы жайында хабарланды. Қайғылы хабарды журналист әрі қоғам белсендісі Сәуле Әбілдаханқызы жеткізді.

9 шілде күні танымал қазақстандық композитор Кеңес Дүйсекеев қайтыс болды. Қазақстанның еңбек сіңірген қайраткері 74 жасында өмірден озды.

Дәл сол күні Өскемен полиция басқармасының бастығы Дәуір Ыбыраевтың мезгілсіз қазасы туралы хабарланды.

Қаралы хабарды Шығыс Қазақстан облысы полиция департаменті жеткізді.

10 шілде күні Алматы облысының бас сантиар дәрігері Қайрат Баймұхамбетов өмірден өтті. Ол пневмония салдарынан көз жұмған.

10 шілде күні Алматы облысы тағы бір қайғылы жағдайға тап болды. Бас санитар дәрігердің өлімінен кейін облыс әкімінің орынбасары Серікжан Бескемпіровтың қайтыс болғаны хабарланды. Хабар 24 арнасы таратқан ақпаратқа сәйкес, Серікжан Бескемпіров те пневмониядан көз жұмды.

11 шілде күні еліміз белгілі уролог-дәрігер Әділжан Хамзиннен айырылды. Қайғылы хабарды оның әріптесі, Халықаралық репродукция академиясының президенті Вячеслав Локшин Facebook-тегі парақшасында жариялады.

11 шілде күні тағы бір мықты медицина маманы ортамызда кетті. Ақтөбедегі жұқпалы ауруларға арналған аурухананың бас дәрігері Қалихан Қозбағаров пневмониядан көз жұмды.

"Диапазон" басылымының мәліметінше, бас дәрігер соңғы күндері өзі басқаратын ауруханада төсек тартып жатқан.

Мәтіннен қате тапсаңыз, бізге жазыңыз