Елордада карантин күшейтілді: Мейрамхана, бар және дәмханалар қалай жұмыс істейді

30 наурыздан бастап елорданың бас мемлекеттік санитарлық дәрігері Сархат Бейсенованың жаңа қаулысына күшіне енеді. Осы орайда қоғамдық тамақтану объектілерінің қалай жұмыс істейтіні белгілі болды деп хабарлайды Нұр-Сұлтан әкімдігінің ресми сайты.

Жаңа қаулыға сәйкес, елорданың мейрамханалары, кафелері, барлары және дәмханалары жұмыс күндері таңғы 7:00-ден кешкі 22:00-ге дейін жұмыс істей алады.

Демалыс күндері келушілерді қабылдауға тыйым салынады. Тек тамақты жеткізіп беру немесе өзімен бірге алып кету тапсырысы бойынша жұмыс істей алады.

Сонымен қатар қоғамдық тамақтану нысандары санитариялық-профилактикалық іс-шараларды сақтауға міндетті. Орналасқан жеріне қарамастан, ғимараттың толтырылуы 50 пайыздан, орын саны 30-дан аспау қажет.

Сонымен қатар бір үстелдегі адам саны 4-6 қонақтан аспау керек әрі кемінде 2 метр әлеуметтік арақашықтық сақталу тиіс.

Бұл ретте ұжымдық, салтанатты, отбасылық, естелік (банкеттер, үйлену тойлары, мерейтойлар, еске алу), мерекелік корпоративтер мен басқа да бұқаралық іс-шараларды ұйымдастыруға және өткізуге қатаң тыйым салынады.

Жаңа қаулы 2021 жылғы 30 наурызда күшіне енеді.

Естеріңізге сала кетейік, Нұр-Сұлтан 10 наурыздан бері коронавирустың таралу көрсеткіші бойынша "қызыл аймақта". Күн сайын қалада коронавирус жұқтырған 300-ден астам адам тіркелуде.

Осы орайда мамандар елорда тұрғындары мен қонақтарынан коронавирустың одан әрі өршеуіне жол бермеу үшін санитарлық нормалар мен карантиндік режим талаптарын қатаң сақтауды сұрайды.

Мәтіннен қате тапсаңыз, бізге жазыңыз