Денсаулық сақтау министрлігі Қазақстандағы COVID-19 бойынша мәлімдеме жасады

Денсаулық сақтау министрлігі Қазақстандағы коронавирус инфекциясына қатысты жағдай бойынша ресми сайтында мәлімдеме жасады, деп хабарлайды KAZ.NUR.KZ.

Ведомство мәліметінше, Қазақстанда коронавирус инфекциясына байланысты эпидемиологиялық жағдай тұрақты.

"2025 жылдың басынан бері жалпы 329 расталған жағдай тіркелді, қайтыс болу жағдайлары тіркелген жоқ. Өткен жылдың осындай кезеңімен салыстырғанда сырқаттанушылық 3,7 есеге азайған. Республика бойынша аптасына 25 жағдайға дейін тіркелуде.

Инфекциялық төсектердің жүктемесі – 27 пайыз, реанимациялық төсек-орындар – 2 пайыз, сондай-ақ стационарларда коронавирус инфекциясымен 2 науқас ем қабылдауда, жағдайы – орташа ауырлықта.

Әлемдегі жағдай сияқты, Қазақстанда да 2022 жылы алғаш анықталған Омикрон нұсқасының штамдары айналымда жүр.

Омикрон нұсқасы 30-дан астам мутацияны қамтиды және аурудың жеңіл өтуімен сипатталады, сондықтан стационарлық емдеуді қажет етпейді. Аурудың негізгі симптомдары – жоғарғы тыныс жолдарының зақымдануы, мұрынның бітелуі, тамақтың ауыруы, жөтел.

Басқа елдерде сырқаттанушылықтың өсуін ескере отырып, Денсаулық сақтау министрлігі келесілерді ұсынады:

• жіті респираторлық инфекциямен ауыратын адамдармен тығыз қарым-қатынастан аулақ болу; • қолды, әсіресе науқас немесе олардың айналасындағы адамдармен тікелей байланыстан кейін жиі жуу; • үй-жайларды тұрақты түрде желдету; • ауру симптомдары байқалған жағдайда медициналық көмекке жүгіну", - делінген хабарламада.