Қазақстан онкологиясы тарихында алғаш рет: шымкенттік дәрігерлер кеңірдекке аса күрделі отаны сәтті жасап шықты
Жарияланған күні:
Шымкент қалалық онкологиялық орталығында елімізде алғаш рет аса күрделі операция – кеңірдек бифуркациясының резекциясы сәтті жасалды, деп хабарлайды KAZ.NUR.KZ Денсаулық сақтау министрлігінің баспасөз қызметіне сілтеме жасап.
Ведомство мәліметінше, ота 37 жастағы науқасқа жасалды. Дәрігерлер науқастың оң және сол жақ бронхтарын, кеңірдек бифуркациясын кесіп алып, реконструкциялық әдіспен жаңа бифуркация қалыптастырды.
Шымкент қалалық денсаулық сақтау басқармасының міндетін атқарушы Сәуле Дүйсенбаева орталықта болып, ота жасалған науқастың жағдайымен танысты. Ол науқаспен тілдесіп, медицина қызметкерлеріне жоғары кәсіби еңбектері үшін алғысын білдірді.
"Бұл операция Қазақстан онкологиясы тарихында алғаш рет орындалды. Ол жоғары технологиялық әдістерді меңгеруді, командалық үйлесімділікті және дәрігерлердің кәсіби біліктілігін талап етеді. Бұл – шымкенттік дәрігерлердің кәсіби өсуі мен заманауи медициналық технологияларды игерудің нақты нәтижесі", - делінген хабарламада.
Жаңа әдісті тәжірибеге енгізу үшін Шымкент онкологиялық орталығы Ресейдің Н.Н. Петров атындағы онкология ұлттық медициналық зерттеу орталығымен әріптестік орнатқан. Жергілікті мамандар тұрақты түрде шетелдік жетекші мамандардың шеберлік сабақтарына қатысып, кәсіби деңгейін арттырып келеді.
Мәтіннен қате тапсаңыз, бізге жазыңыз