СҚО-да донорлық ота жасаған дәрігерлер бірнеше ересек адам мен баланың өмірін сақтап қалды

Солтүстік Қазақстан облысының көпбейінді облыстық ауруханасында қайтыс болған 1985 жылғы донордың бірнеше ағзасы өзге адамдарға салынды. Отбасының келісімінің арқасында жүрек, бауыр және екі бүйрек алынды, деп хабарлайды Денсаулық сақтау министрлігіне сілтеме жасаған KAZ.NUR.KZ.

Министрлік мәліметінше, донордан алынған ағзалар бірнеше ересек адам мен баланың өмірін сақтап қалуға мүмкіндік берген.

Донорлық процесті Трансплантаттауды үйлестіру және жоғары технологиялық медициналық қызметтер республикалық орталығы ұйымдастырды. Отаға ҰҒОО және UMC транспланттау бригадаларының, өңірлік үйлестірушілердің және барлық қажетті қызметтің өкілдері ат салысты.

Полиция қызметкерлері де бірнеше адамның өмірін сақтап қалуға мүмкіндік берген донорлық отаның сәтті жасалуында маңызды рөл атқарды: олар жедел әрекет етіп, облысқа кеткен дәрігерлер мен мамандарды алып жүруді қамтамасыз етті.

Бұл жағдай донор болған азаматтың отбасының шешімінен бөлек, үйлестірушілердің, медицина қызметкерлерінің және мемлекеттік қызметтердің үйлесімді жұмысы Қазақстанда жүздеген пациенттің өмір сүруіне мүмкіндік беретінін айқын көрсетті, дейді министрлік өкілдері.

Бүгінгі таңда донорлық ағзалардың "Күту парағында" 4300-ден астам адам, олардың ішінде 120-дан астам бала бар.

Мәтіннен қате тапсаңыз, бізге жазыңыз