Тоқаев учаскелік дәрігерлердің жалақысын көтеруді тапсырды: ол 760 мың теңгеге жетуі мүмкін

Денсаулық сақтау министрлігі президент Қасым-Жомарт Тоқаевтың жалпы практика дәрігерлерінің жалақысын көтеру туралы тапсырмасынан кейін қандай шаралар қабылданатынын түсіндірді, деп хабарлайды KAZ.NUR.KZ.

Бүгін мемлекет басшысы Қасым-Жомарт Тоқаев Қазақстан халқына жолдауында үкіметке 2027 жылғы 1 қаңтардан бастап үздіксіз еңбек өтіліне қарай учаскелік қызмет мамандарының жалақысын 40 пайызға дейін арттыруды тапсырды. Президенттің айтуынша, бұл 77 мыңнан астам маманның табысын өсіруге мүмкіндік береді.

Денсаулық сақтау министрлігі Telegram-дағы арнасында келесі жылдан бастап медициналық-санитариялық алғашқы көмектің учаскелік қызмет мамандарына қосымша ақы төленетінін мәлімдеді. Қосымша ақының мөлшері еңбек өтілінің ұзақтығына байланысты белгіленеді. Ол лауазымдық жалақының 50 пайызына дейін жетуі мүмкін.

Ведомство қосымша ақыны мынадай мөлшерде белгілеуді ұсынады:

• 2 жылдан астам үздіксіз еңбек өтілі үшін – лауазымдық жалақының 20 пайызы;
• 3 жылдан астам еңбек өтілі үшін – 30 пайызы;
• 5 жылдан астам еңбек өтілі үшін – 50 пайызы.

"Мемлекет басшысының қолдауымен медициналық алғашқы көмек буынының кадрлық әлеуетін нығайту үшін алғаш рет осындай ауқымды қолдау шаралары қабылданып отыр. Біздің басымдығымыз – емханалар мен ауылдық дәрігерлік амбулаторияларда халыққа көрсетілетін медициналық көмектің сапасы мен қолжетімділігін арттыру. Бұл жалпы практика дәрігерлері мен учаскелік қызмет мейіргерлерінің біліктілігі мен тәжірибесіне тікелей байланысты", - деп атап өтті денсаулық сақтау министрі Ақмарал Әлназарова.

Министрліктің мәліметінше, үздіксіз еңбек өтілі үшін қосымша ақы енгізілгеннен кейін ауылдық жерлердегі ең жоғары еңбек өтілі бар жалпы практика дәрігерлерінің жалақысы қосымша ақыны ескергенде 760 мың теңгеге, ал қалаларда 607 мың теңгеге дейін жетуі мүмкін.

"Ауылдық жерлерде ең жоғары еңбек өтілі бар жалпы практика дәрігерлерінің жалақысы 534 мың теңгеден 760 мың теңгеге дейін, ал орта медицина персоналының жалақысы 284 мың теңгеден 401 мың теңгеге дейін өсуі мүмкін.

Қалаларда ең жоғары еңбек өтілі бар жалпы практика дәрігерлерінің жалақысы 425 мың теңгеден 607 мың теңгеге дейін, ал орта медицина персоналының жалақысы 224 мың теңгеден 318 мың теңгеге дейін артуы ықтимал", - деп түсіндірді ведомство өкілдері.

Ал ауылдық жерлердегі еңбек өтілі аз жалпы практика дәрігерлерінің жалақысы 386 мыңнан 450 мың теңгеге дейін, орта медицина персоналының жалақысы 221 мыңнан 256 мың теңгеге дейін өсуі мүмкін. Қалаларда еңбек өтілі аз жалпы практика дәрігерлерінің жалақысы 307 мыңнан 358 мың теңгеге дейін, ал орта медицина персоналының жалақысы 173 мыңнан 202 мың теңгеге дейін көтерілуі ықтимал.

"Медициналық алғашқы көмек буынында жұмыс істейтін психологтар мен әлеуметтік қызметкерлерге де қосымша қолдау көрсету ұсынылып отыр. Олардың қызметінің ерекшелігін ескере отырып, психоэмоциялық жүктемесі үшін қосымша ақы енгізу мәселесі қарастырылып жатыр", - делінген хабарламада.

Денсаулық сақтау министрлігі медицина қызметкерлерінің жалақысын арттыру жұмыстары 2021 жылдан бастап кезең-кезеңімен жүргізіліп келетінін еске салды.

"Инфекциялық қызмет пен жедел медициналық жәрдем қызметкерлеріне арналған қосымша қолдау шаралары да іске асырылып жатыр. 2026 жылдың басынан бастап инфекциялық қызметтің шамамен 24 мың маманы мен жедел медициналық жәрдемнің 9 мың қызметкеріне жоғарылатылған төлемдер қарастырылған.

Үздіксіз еңбек өтілі үшін қосымша ақы енгізу тәжірибелі мамандарды қолдауға, емханалар мен дәрігерлік амбулаторияларда жұмыс істеуге ынталандыруға, сондай-ақ медициналық кадрларды, әсіресе ауылдық жерлерде, тұрақтандыруға бағытталған", - деп мәлімдеді ведомство.

Бұл шараларды іске асыру учаскелік қызметті нығайтуға, кадр тапшылығын азайтуға және халық үшін медициналық көмектің қолжетімділігін арттыруға мүмкіндік береді деп күтіліп отыр.

Мәтіннен қате тапсаңыз, бізге жазыңыз