Сарыағашта алғаш рет аса күрделі ота жасалды

Сарыағаш орталық аудандық ауруханасында алғаш рет ішкі ұйқы артериясын стенттеу отасы жасалды. Тіліксіз ангиография аппаратының көмегімен мұндай операцияны дәрігерлер үш науқасқа сәтті жасап шыққан, деп хабарлайды otyrar.kz.

Басылым мәліметіне сүйенсек, тың әдіспен жасалған ота облыстық клиникалық ауруханасының нейрохирург дәрігерлері Сапаков Сапарғали, Орал Абылайхан және аудандық орталық аурухананың нейрохирург дәрігері Кұдияров Байбектің қатысуымен жүзеге асқан.

Айта кетейік, бұрын мұндай ота қажет науқастар жедел және жоспарлы түрде облыс орталығына жіберілетін.

Қазір аудандағы орталық аурухана дәрігерлері жоғары технологиялық операцияны меңгеріп, хирургиялық көмек көрсетуде.