Атырауда 6 айлық сәби абайсызда сим-карта жұтып қойған

Атырауда 6 айлық сәби абайсызда мобильді телефонның сим-картасын жұтып қойған. Анасы сәбидің жөтелуіне байланысты жедел жәрдем стансасына хабар берген, деп хабарлайды Kazinform.

Атырау облыстық жедел жәрдем стансасы директорының орынбасары Наргиз Баймолдаеваның айтуынша, диспетчер бөбектің анасы мен кеңес беретін дәрігерді байланыстырған.

"Мұндай жағдайда абыржымау қажет. Бұл біздің стансаның қызметкерлеріне де байланысты қадам. Диспетчер телефонмен хабарласқан ананы дәрігер-кеңесшінің пультіне ауыстырған", - дейді ол.

Ал кеңесші дәрігер Гүлнәз Қырықбаева баланың туыстарына алгоритм бойынша қадамдық іс-қимыл жасау жөнінде кеңес берген.

"Ол телефон арқылы алғашқы медициналық көмек көрсетудің әдістерін түсіндірді. Кеңесші дәрігердің телефонмен айтқан нұсқауымен туыстары сәбидің тыныс алу жолына түскен бөгде затты шығарып алды", - дейді Наргиз Баймолдаева.

Жедел жәрдем бригадасының қызметкерлері шақырту бойынша оқиға орнына келіп, сәбиге медициналық көмек көрсеткен.

Мәтіннен қате тапсаңыз, бізге жазыңыз