"Бүгін сенің туған күнің": туған күн иесіне арналған мәнді құттықтау тілектер

Туған күн – ақ тілектерден шашу шашылатын күн. Туған күн иесіне түрлі тілектер айтылып жатады, соның ішінде сіздің тілегіңіз сәл ерекше болсын десеңіз, KAZ.NUR.KZ ұсынған туған күнге арналған тілектерді жолдауға болады.

Туған күн иесіне жаттанды құттықтауларды айтудан шаршағандар назарына еш жерде қайталанбайтын ерекше тілектер топтамасын ұсынамыз.

• Бірінші – ұзақ жасты өмірлі бол, Екінші – тіл мен көзден аман бол, Үшінші – берекелі, беделді бол, Төртінші – арыстандай айбатты бол, Бесінші – ақылды, қайратты бол, Алтыншы – өнерлі бол.
• Аққудың ақтығын, Өмірдің пәктігін, Арманның ажарын, Бақыттың базарын, Денсаулықтың зорын, Махаббаттың молын тілеймін!
• Емен ағашы жуан, жапырағы қалың болғанына қарамастан, қатты жел тұрса, тамырымен қопарылып құлап қалады. Ал қайың ағашы жіңішке, нәзік болғанымен, қатты жел тұрғанда сәл майысады да, жел басылған соң бойын қайта тіктеп, жапырақтарын күннің нұрына малындырып жайқалып тұрады. Бүгінгі туылған күн иесі де осы қайын ағашы тәріздес – өмірде де, қызметте де басына қандай қиын іс түссе де жасымаған, бағы жанса тасымаған, тіршіліктің қандай ауыртпалықтарын, қиын кезеңдерін көрсе де мойымай, күресе білген азамат, мықты қызметкер, аяулы жар, ардақты әке және де айнымас адал дос.
• Көлдей көңіл тілеймін таусылмайтын, Өзендей өмір болсын сарқылмайтын. Аспаның айлы түндей ашық болсын, Дұшпаның бір өзіңнен қашық болсын. Айта берсек тілек көп таусылмайтын, Жаза берсек қалам көп майыспайтын. Жүректегі тілекті өлеңменен Жеткіземін мен саған шын көңілмен!!
• Саған айтар тілек, Таусылма еш жүдеп. Қиналсаң, төз, Жарыссаң, оз, Ойнасаң, ұт, Күрессең, жық. Ешкімді басынба, Басыңнан асырма, Табысқа тасыма, Намысқа жасыма. Ешкімді күндеме, Ешкімді тілдеме, Сөзіңнен танба, Қатарыңнан қалма. Біреуді даттама, Ешқашан кек сақтама, Біреуді сыртынан айдама, Өсекті тыңдама, Шынығып, шыңдал, Жақсыдан үлгі ал!
• Туған күн – ғажайып армандар мен жарқын үміттерге толы өміріңнің жаңа бастамасы. Ондағы бар арман-тілектерің орындалсын! Туған күніңмен құттықтаймын! Сенің бойыңда көшбасшылық қасиетпен қатар қарапайымдылық пен мейірімділік ерекше үйлесмділік тапқан. Көздеген шыңдарыңды бағындырып, діттеген мақсаттарыңа жетуіңе тілектеспін!
• Бұл күн күнтізбеде қызылмен белгіленбеген бізге ғана ортақ мейрам болса да, әлемде осы күнге жетер тамаша күн жоқ. Себебі дәл осы күн – біздің әлем сенімен толыққан күн. Біз сені туған күніңмен құттықтап, зор денсаулық, сарқылмас бақыт тілейміз! 

• Сені туған күніңмен шын жүректен құттықтаймыз, ойлаған арманыңа жетуіңе тілектеспіз. Сені тек биіктерден көрейік. Қадамыңа – гүл, келбетіңе – нұр, қиялыңа – қанат бiтсiн, жасыңа жас, басыңа бас қосылсын! Шаңырағыңа құт-береке, бейбіт күннің арайлы шуағы мейлінше төгіле түссін, отбасыңа – амандық, денiңе – саулық, ұзақ ғұмыр тiлеймiз, арманың асқақ, шығар биігің асқаралы болсын! Әрдайым құшағың гүлге, қадамың нұрға тола берсін! Бақытты өмір сүруіңе шын жүректен тiлектеспiз!
• Уақыт – ешкім тоқтата алмайтын алып кеме. Сол кеменің жүрісімен сен де өмір толқындарымен араласа, арпалыса, балалың шақ жағалауына қол бұлғап, адам өмірінің көктемі – жастық шаққа да келіп жетерсің. Өмір – шуағы мен дауылы, қайғысы мен сауығы, жеңілі мен ауыры қатар алмасқан алпауыт. Өмірмен күресіп жеңе білгендер де, жеңіліп, жетегінде кеткендер де бар. Сен солардың алғашқысына қосыл. Өмірде кездесетін сан қилы ауырлықтар мен қиындықтарды ақылмен, сабырмен жеңе біл. Аспан бұлтсыз болмайды, демек адам өмірінің де бұлтты күндері болар. Бірақ сенің өміріңнің шуақты күндері көп болсын! Аңсаған арманыңа жете бер!
• Қазақ тілінде қысқа да нұсқа, әрі дәл айтылған үш тілек бар. Мен саған соны тілеймін. Олар: денсаулық, бақыт, ұзақ өмір. Себебі, денсаулық болса, жұмыс та болады, табыс та болады. Бақыт деген сөздің ауқымы кең: себебі, біреулер үшін бақыт деген – сүйген адамының қасында аман-сау жүргені, бақыт деген – біреулер үшін ата-анасының қуанғаны, ал біреулер үшін бақыт деген балаларының бақытты болғаны. Ал егер де денсаулық пен бақыт болса, неге ұзақ өмір сүрмеске?! Денсаулығың мықты болсын, бақыт құсы басыңа қонсын, өмір жасың ұзақ болсын!

Бұған қоса, туған күнге арналған 41 ерекше тілек әзірлеген едік, соның арасынан да көңілізге жаққанын туған-туыс, дос-жаранға жолдауға болады.

Сол сияқты zharar.com сайты ұсынған туған күнге арналған қысқа, есте тез сақталатын тілектермен де таныс болыңыздар:

• "Бақыт деген досыңның – қабағында, жарынның – жанарында" дейді. Осындай өмірлік дос болып өтіңіздер.
• Өміріңіз мәнді, шаңырағыңыз сәнді болғай. Дастарханыңыздан дәм-тұзыңыз үзілмей, барыңыз берекеге, берекеңіз мерекеге ұлассын.
• Көңіліңіз көктемнің шуақты күніндей болып, жылы жүзіңізден күлкі кетпесін.
• Сезіміңе берік болған барлық армандарың орындалсын.
•  Келген күн жақсылығымен келіп, шуағына шомылдырсын.
• Келіннің қолынан шай ішкізіп, немере қолынан су ішіп, шөбере қолынан май жалататын күнге жеткізсін.
• "Ағаш тамырымен, адам достарымен қымбат" деген, ендеше, достарың көп болсын.
• Көңіліңіз қартаймасын, құт-берекеңіз ешқашан ортаймасын.
• Өміріңізде жеңісті күндеріңіз көп болсын.
• Отбасыңызға келген қуаныш тек өзінің жақсылығы мен ырзығын арқалап алып келсін.
• Күндеріңіз көркем, жылдарыңыз жемісті болсын.
• Ата-анаңның аяулысы бол, Алланың сүйкімдісі бол.
• Еңсеміз тік, қадамымыз нық болсын.
• Жаныңыз қашанда сәбидің жанындай таза болсын.
• Жарық та, жарқын аяулы күндеріңіз нұрға толсын.
• Өмірде "әттеген-ай" деген аз болып, "шіркін-ай", "пай-пай" дегеніміз басым болсын.
• Өмірің нұрлы болсын, көңілің жырға толсын.
• Бірімізге-біріміз шаттық сыйлап, әрбір күнді қуанышқа толтырайық.
• Әрқашанда жақсылық жандарыңыздың серігі болсын, қуаныштарыңыз ұзағынан сүйіндірсін.
• Қыдыр қонып, бақ дарысын.
• "Кең болсаң, ештеңеден кем болмайсың" демекші, қашанда жүрегің ашық, пейілің кең болсын.
• Келген мүшел жасыңнан аман-есен, сүрінбей өтуіңе тілектеспіз.
• Алланың алақанындағы ғұмырыңыз ұзарсын.
• Ай мен күнге теңейтін балаңыз аман болсын, бағы жансын.