Дисней кейіпкерлерінің шынайы өмірдегі келбеті қандай

АҚШ колледжінде оқитын жігіт Дисней кейіпкерлерінің шынайы өмірдегі келбетін жасап шықты. Бұл туралы KAZ.NUR.KZ порталы vinegred.ru сайтына сілтеме жасап хабарлайды.

Бүгінде Дисней мультфильмдерін ұнатпайтын адам кемде-кем. Балалық шағыңыздың маңызды бөлігіне айналған шытырман оқиғаларға толы мультфильмдердің басты кейіпкерлері шынайы өмірде қандай болар еді?

Бұл сұрақ мультфильмсүйер қауымға қызықты болатынын түсінген желі қолданушысы өз нұсқасын ұсынды. Toyboyfan есімімен Instagram желісіне тіркелген азамат Дисней кейіпкерлерінің шынайы өмірдегі келбетін жасауға тырысқан.

Ол "Шынайы өмірде" атты жобасын құру арқылы Дисней кейіпкерлерінің гиперреалистік портреттерін жасап, әлем назарына іліккен.

"Әдетте Дисней кейіпкерінің суретінен және таңдалған кейіпкерге ұқсайтын нақты адамның фотосуретінен бастаймын, содан кейін мен осы кадрларды бағдарлама көмегімен біріктіремін. Артынша, фотошоппен әрлеймін", - деп құпиясымен бөлісті суретші.

Ол - графикалық дизайнер мамандығы бойынша оқитын АҚШ колледжінің студенті екен. Жігіт неліктен Диснейді туындыларына арқау еткенін түсіндірді:

"Мен Дисней кейіпкерлерінің әртүрлі нұсқаларын өмірде көргендіктен, олардың өзіндік нұсқасын жасауға тырысқым келді», - дейді ол.

Ал сіз оның туындылары туралы не ойлайсыз? Суреттегі адамдар Дисней кейіпкерлеріне расымен ұқсайды деп ойлайсыз ба?

Еске салсақ, бұған дейін біз ат құлағында ойнайтын отандық каскадерлар Диснейдің "Мулан" фильмінде бой көрсеткенін жазған едік.

Одан бөлек, Дисней десе ішкен асын жерге қоятын отбасы үйін ертегі әлеміне айналдырғанын жазған болатынбыз.

Мәтіннен қате тапсаңыз, бізге жазыңыз