Аяғы ауыр келіншекті әскерилер емханаға зембілмен арқалап апарды (фото, видео)

Үндістандағы қарлы өңірлердің бірінде тұратын аяғы ауыр келіншекті әскерилер емханаға зембілмен арқалап жеткізді деп хабарлайды The Indian Express.

Үндістанның Купвара округінде тұратын жүкті келіншек өңірде қалың қар жауғандықтан, емханаға жете алмай қиналған. Қар қалыңдығы тізеге дейін жететін аймақта аяғы ауыр келіншекке емханаға барудың өзі мұң болған.

Жүкті әйелдің күйеуі не істерін білмей үнді әскерінің жақын маңдағы жедел базасына қоңырау шалады. Шұғыл көмек қажеттігін түсінген әскерилер жүкті келіншекке дереу көмекке шығуды ұйғарады.

Қолдан жасалған зембілге келіншекті отырғызып алған әскерилер оны екі шақырым бойы арқалап өткен. Азды-көпті қардан тазарған аймаққа зембілмен жеткізілген келіншек, одан әрі көлікке отырғызылып, емханаға аман есен жатқызылады.

Дер кезінде емханаға жетіп, сәтті босанған келіншектің ұлды болғаны белгілі болып отыр. Бұл оқиға туралы естігендер ерлі-зайыптыны ұлды болуымен құттықтап қана қоймай, әскери қызметкерлерге мақтауларын жаудырды.

Еске салсақ, бұған дейін коронавирустың жүкті әйелдерге қалай әсер ететіні белгілі болғанын жазған едік.

Ұлыбританияның Бирмингем университетінде және Қытайдың Гуаньчжоу медицина университетінде қызмет ететін зерттеушілер COVID-19 инфекциясын жұқтырған жүкті әйелдер мерзімінен бұрын босанып қалуы мүмкін екенін ескертуде.