Әлемдегі ең үлкен ауызға ие ару туралы не білеміз

31 жастағы АҚШ тұрғыны Саманта Рамсделл әлемдегі ауызы ең үлкен әйел ретінде Гиннестің рекордтар кітабына енді. Саманта аз уақыттың ішінде TikTok желісінде жұлдызға айналып үлгерген деп жазады KAZ.NUR.KZ тілшісі guinnessworldrecords.com басылымына сілтеме жасап.

АҚШ-тың Коннектикут штатында тұратын Саманта аузының ерекше үлкен болуының арқасында әлемге танылды. TikTok әлеуметтік желісінде видео түсіре бастаған ол біршама уақыттан соң желі қолданушыларының қызығушылығын тудырған.

Ауызының көлемі кішкентай кезінен Самантаның жанды жері болатын. Ол өзінің бет-бейнесіне көңілі толмай, жасөспірім шағында балалардың мазағына да тап болғанын жасырмады.

Бірақ, жасына жас қосылған сайын оның өмірге деген көзқарасы да өзгере түсіп, бойындағы бұл ерекшелікті қабылдай білген.

Осылайша, Саманта желіге видеолар түсіріп, жүктей бастапты. Оқырмандары көбейе түскен сайын, оның желідегі белсенділігі де арта түскен.

Желі қолданушылары оған Гиннестің рекордтар кітабына өтініш беруге кеңес берген соң, Саманта олардың бұл кеңесіне құлақ түріп, бағын сынап көріпті.

Гиннесс комитеті әйелді төрешімен бірге тіс дәрігеріне апарып, оның ауыз қуысын өлшеп көрді. Нәтижесінде әйелдің ауызын 6,52 сантиметрге дейін керіп аша алатыны анықталып отыр.

Осы арқылы Гиннестің рекордтар кібатына енген Саманта өзін кішкентай күнінде мазақ еткендерге жауап бердім деп есептейді.

"Ауызым үлкен шығар, бірақ бұл - әлемдегі ең үлкен ауыз", - дейді ол.

Еске салсақ, бұған дейін Миннесота штатының тұрғыны Айзек Джонсон әлемдегі ең үлкен ауызға ие азамат ретінде рекорд орнатқан болатын. Ол аузын 10,175 сантиметрге дейін керіп аша алған жасөспірім деп танылған.