Мысыр археологтары алтын тілді мумиялар тапты (фото)

Ніл өзенінің сағасында орналасқан Минуфия провинциясындағы ғибадатханада жұмыс істейтін мысырлық археологтар алтын тілді бірнеше мумия тапты. Бұл туралы елдің Туризм және көне жәдігерлер министрлігі хабарлады, деп жазады KAZ.NUR.KZ Синьхуа агенттігіне сілтеме жасап.

Министрлік мәлімдемесінде әр түрлі дәуірлерге, соның ішінде соңғы династиялық және Эллинизм дәуіріне жататын қабірлерден аузына тіл формасындағы алтын салынған бірнеше мумия табылғанын атап өткен.

Сондай-ақ министрлік мумиялардың нашар сақталғанын, бұл бейіттердің тоналғанын білдіретінін айта кеткен.

Сонымен қатар қабірлерден алтын парақтарға оралған бірнеше қаңқа, адам пішіндегі бірнеше ағаш саркофаг, қыш-құмыра бұйымдары және мумияға айналдыру арналған материалдар табылған.

Археолог Бахаа әл-Нагар Синьхуа агенттігіне берген сұхбатында ғалымдар "тілдер марқұмның ақыретте сөйлей алуын қамтамасыз ету үшін алтыннан жасалған" деп санайтынын жеткізді.

Оның сөзінше, ертеде билеушілер бетперделерін, саусақтары мен тілдерін алтынмен безендірген, өйткені бұл мәңгі жарқырап тұратын метал.

Мәтіннен қате тапсаңыз, бізге жазыңыз