"Парик ағашы": Алматының ботаникалық бағында ерекше ағаш гүлдеді (видео)

Алматыдағы Ботаникалық бақта "парик ағашы" деген атаумен белгілі былғары скумпия гүлдеді, деп хабарлайды KAZ.NUR.KZ.

Ботаникалық бақтың Instagram-дағы парақшасында гүлдеп тұрған ерекше ағаштың видеосы жарияланды.

Ботаникалық бақтың мәліметінше, былғары скумпия – жапырақ түсіретін, қатты бұтақтанатын бұта немесе шағын ағаш, Anacardiaceae тұқымдасына жатады. Табиғи жағдайда ол Батыс Еуропада, Балқан түбегінде, Түркияда, Кавказда, Қытайда және Үндістанда кездеседі.

Скумпияның басты ерекшелігі – оның сыпыртқы тәрізді гүлшоғырлары. Гүлдегеннен кейін олар жеңіл, үлпілдек бұлттарға айналып, парикке ұқсайды. Жазда өсімдік жеңіл тұман сияқты әсер береді, ал күзде жапырақтары сарыдан қанық қызыл түске дейін өзгеріп, жылы реңктерге боялады.

"Әсемдігімен қатар, скумпия пайдалы қасиеттерімен де белгілі. Оның жапырақтарында маталарды сары және қызғылт-сары түске бояуға қолданылатын табиғи бояғыш – физетин бар.

Ағашы берік, жеңіл және шіруге төзімді, ал құрамындағы илік заттардың көп болуы оны былғары илеу өндірісінде құнды етеді. Сондай-ақ бұл өсімдіктің әртүрлі бөліктері дәстүрлі медицинада қолданылады", - дейді Ботаникалық бақтың өкілдері.

Посмотреть эту публикацию в Instagram

Публикация от Главный Ботанический Сад г.Алматы (@botsadkz)

Мәтіннен қате тапсаңыз, бізге жазыңыз