"Бұл уақытша тренд": министр кәсіпкерлердің мобильді аударымдарды қабылдаудан бас тартуы туралы айтты

Ұлттық экономика министрі Әлібек Қуантыров үкіметте өткен брифингте қазақстандық кәсіпкерлер жаңа түзетулер күшіне енгеннен кейін банктік аударымдарды қабылдаудан қорқақтайтынын айтты. Бұл туралы KAZ.NUR.KZ тілшісі хабарлайды.

Бүгін ұлттық экономика министрі Әлібек Қуантыров қазақстандық бизнес иелері жаңа түзетулер күшіне енгеннен кейін банк аударымдарын қабылдаудан бас тартуына қатысты ой бөлісті. Ол қазіргі жағдайды "уақытша тренд" деп атады.

"Бұл уақытша тренд. Бұл кәсіпкерлер тарапынан түсінбеушіліктен, жағдайды толық түсінбеу салдарынан болған дүрбелең. Біз "ақ" жолмен жұмыс істегіміз келеді. Бұл жерде кәсіпкерлер тарапынан мұны елің үшін істеп жатқаныңды түсіну маңызды. Көлеңкелі аймақта жұмыс істеуге болмайды", - деді ол.

Оның айтуынша, Қазақстан - қаржылық технологиялар мен мобильді аударымдар бойынша әлемдегі цифрландырылған елдердің бірі.

"Бізге АҚШ пен Еуропадан шетелдіктер келеді. Барлығы цифрландыру деңгейіне таң қалды. Сондықтан біз сол трендте қаламыз деп ойлаймын. Қазір бәрі үйреніп кетеді. Қаржы министрлігі мәлімдеме жасады: егер шағымдар болса, тиісті өтінішпен шағымдануға болады.

Жағдай түзеледі деп ойлаймын. Мен өзім электрондық гаджеттерді белсенді пайдаланамын. Өте ыңғайлы. Бірақ экономика үшін айтарлықтай проблема болмайды деп ойлаймын. Барлық адамдар тауарды ақшаға болса да сатып алады. Банктер банкоматтарға көбірек қолма-қол ақша салуы керек", - деп түйіндеді сөзін министр.

Еске салсақ, 2024 жылғы 1 қаңтардан бастап Қазақстанда мобильді аударымдар тексеріле бастады. Бірақ қарапайым халыққа алаңдауға негіз жоқ екені айтылды, мұндай тексерулер аударымдарды кәсіпкерлік қызметінен түскен кірісін жасыру үшін пайдаланатындарға ғана қатысты.

Мәтіннен қате тапсаңыз, бізге жазыңыз