2024 жылы бизнесті тексеруге мораторий алынады: кәсіпкерлер жаппай тексеріле ме

Премьер-министр Әлихан Смайылов "24KZ" телеарнасына берген сұхбатында 2024 жылы бизнесті тексеруге мораторий алынып тасталғаннан кейін қазақстандық кәсіпкерлерді не күтіп тұрғаны туралы айтты. Бұл туралы үкімет Telegram арнасында хабарлады.

Үкімет мәліметінше, шағын және орта бизнес кез келген елдің экономикасы мен тұрақтылығының негізі. Сондықтан мемлекет қолайлы бизнес-ортаны құруға үлкен мән беріп отыр.

"Біз бизнес қауымдастықпен бірлесіп, кәсіпкерліктің дамуына кедергі келтіретін шектен тыс талаптарды анықтау бойынша үлкен жұмыс атқардық. Нәтижесінде 10 мыңнан астам негізсіз талапты анықтадық. Бүгінде оның 9 мыңының күші жойылды. Қалғаны келер жылдың басында Парламентте тиісті заң қабылданғаннан кейін алынып тасталады", — деді Әлихан Смайылов.

Оның айтуынша, тәуекелдерді басқару жүйелерін автоматтандыру бойынша да жұмыстар жүргізілді.

Үкімет бұл адами факторды жоя отырып, тексерулерді жоспарлауға мүмкіндік беретінін атап өтті. Нәтижесінде олардың саны 2 есеге қысқарып, жалпы заңға бағынатын кәсіпкерлерге әкімшілік қысым азаяды.

"Осылайша, мораторий аяқталғаннан кейін елде жаппай тексерулер болмауы керек. Адал кәсіпкерлердің алаңдауына еш негіз жоқ", — деді премьер-министр.

Үкімет басшысының айтуынша, шағын және орта бизнестің экономикадағы үлесі ЖІӨ-нің 36,5%-ына дейін өсті.

Биылдың өзінде мұнда жұмыспен қамтылғандар саны 500 мыңға артып, 4,3 млн адамға жетті. Өсу қарқыны шамамен 14% құрады.

"Бұл ретте біздің алдымызда орта мерзімді перспективада ШОБ үлесін ЖІӨ-нің 40%-ына дейін арттыру міндеті тұр. Бұл еліміздің одан әрі тұрақты дамуына негіз болады", — деп түйіндеді ол.

Мәтіннен қате тапсаңыз, бізге жазыңыз