"Өтінім түскен жоқ": Қазақстанның көлік министрлігі Ресейдің ішкі рейстерге көмектесу туралы "өтінішін" жоққа шығарды

Ресей Көлік министрлігінің ішкі жолаушылар рейстерін ұйымдастыру, атап айтқанда, қазақстандық ұшақтарды тарту туралы "өтінішіне" Көлік министрлігі түсініктеме берді. Бұл туралы KAZ.NUR.KZ хабарлайды.

Ресейлік Тhe Moscow Times басылымының хабарлауынша, Ресей Көлік министрлігінің басшысы Роман Старовойт оның ведомствосы Қазақстанның әуекомпанияларын Ресей ішінде ұшуға тарту туралы келіссөздер жүргізіп жатқанын хабарлады. Әңгіме каботажды тасымалдау туралы болып тұр.

"Каботаждық тасымалды шешу мүмкіндігі әуе паркінің тапшылығы аясында қарастырылуда", - дейді ресейлік шенеунік басылым.

Көлік министрлігінің баспасөз қызметінің NUR.KZ тілшісіне берген ақпаратына сәйкес, бүгінге дейін ресейлік тараптан каботаж мәселесіне қатысты ресми өтініш түскен жоқ.

Ведомство Қазақстандағы жолаушылар айналымының өсімі жыл сайын шамамен 15 пайызды құрайтынын атап өтті. Биылғы 8 айында қазақстандық әуе компаниялары 10 миллионнан астам адамды тасымалдады, бұл 2023 жылмен салыстырғанда 13 пайызға артық.

Сонымен қатар, осы кезеңде ішкі әуежайлар қызмет көрсеткен жолаушылар саны 20,1 млн адамды құрады, бұл өткен жылмен салыстырғанда 16 пайызға артық.

"Тұрақты жолаушылар тасымалын орындайтын отандық әуе компаниялардың әуе кемелерінің паркіндегі ұшақтар саны – 101. Жыл сайын ол жаңа заманауи әуе кемелерімен толықтырылады. Ағымдағы жылы жаңа 8 ұшақ келді.

Айта кету керек, салалық мемлекеттік органның саясаты бірінші кезекте отандық ішкі әуе тасымалы нарығының өсіп келе жатқан қажеттіліктерін жабуға бағытталған", - деп толықтырды ведомстводан.