Алматы облысының әкімі жалақысына қатысты сұраққа жауап берді

Алматы облысының әкімі Марат Сұлтанғазиев Астанада жыл қорытындысына арналған брифингте жалақысына қатысты сауалға жауап берді. Бұл туралы KAZ.NUR.KZ хабарлайды.

Журналистер ашық мәліметтерде Сұлтанғазиевтің айлығы 2 млн 414 мың теңге деп көрсетілгенін, ал Алматы облысында орташа жалақы, статистикалық мәліметке сай, 454 мың теңге екенін атап өтті.

БАҚ өкілдері премьер-министр мен оның орынбасарлары шамамен 2,5 млн теңге алатынына, ал Сұлтанғазиевтің өңірдегі әріптестерінің орташа жалақысы 1,7 млн теңге екеніне назар аударды.

Сол себепті, журналистер осы өңірдегі шенеуніктер не себепті басқа да өңірлерге қарағанда көп жалақы алатынын сұрады.

"Мемлекет қызметкерлері, саяси және әкімшілік қызметкерлерінің жалақысы бәріне бірдей. Айлық жұмыс өтіліне, атқарған қызметіне қарай түрленеді. Бұл ретте, жұмыс ауқымы мен ауырлығы да ескеріледі. Сол себепті мұндай айтарлықтай айырмашылық болмауы керек. Соған қарағанда, айлық аудару мен алу арасында бір қателік бар болса керек", - деп түсіндірді Марат Сұлтанғазиев.

Алматы облысының әкімі Астанадағы осы брифингте Талғарда ұйымдасқан қылмыстық топ бар ма деген сауалға жауап берген.

Сонымен бірге Марат Сұлтанғазиев жасөспірім Шерзат Болаттың өліміне қатысты пікір білдірген.

Мәтіннен қате тапсаңыз, бізге жазыңыз