Қазақстанда құс өсірушілер қымбаттап бара жатқан жұмыртқа бағасын ұстап тұруға келісті

Елімізде құс өсірушілер жұмыртқа бағасын ұстап тұруға келісті. Жауапты министрліктер мен Құс өсірушілер одағы күн санап қымбаттап бара жатқан өнімнің бағасын реттеу үшін арнайы меморандумға қол қойды, деп хабарлайды "КТК" арнасы.

Әлеуметтік маңызы бар азық-түлік ішінде жұмыртқа аса жиі тұтынылатын өнім. Меморандум шарты бойынша енді құс өсірушілер бұдан былай бірінші санаттағы жұмыртқаны фабрикадан бір данасын 55 теңгеден сатуға тиіс. Ал тауар сауда орнына түскенде үстеме 15 пайыздан аспауы керек.

Бүгінде сауда орындарында жұмыртқаның бір данасы 100 теңгеге жеткен.

"Меморандумның негізгі мақсаты — әлеуметтік маңызы бар тауарлардың негізгі бір бөлігі болып саналатын жұмыртқа бағасын негізсіз өсіруге жол бермеу. Кәсіпкерлердің әлеуметтік жауапкершілігін арттыру. Өз тарапынан сауда желілері әлеуметтік маңызы бар азық‑түлік тауарларының қатарына жататын жұмыртқаға ретро бонус салмау және сауда үстемесін сақтау бойынша міндеттемелер алды", - дейді Сауда және интеграция министрлігінің баспасөз хатшысы Тойгүл Жұбанисова.

Дереккөз: "КТК" арнасы