Екібастұз моноқала санатынан шықты

Екібастұз экономиканы табысты әртараптандыруды көрсетіп, моноқала санатынан шықты, деп хабарлайды Ұлттық экономика министрлігіне сілтеме жасаған KAZ.NUR.KZ.

Ұлттық экономика министрлігі еліміздегі моноқалалар тізбесін жаңартқанын мәлімдеді. Тиісті өзгеріс "Қазақстан Республикасы моноқалаларының тізбесін бекіту туралы" ҚР Ұлттық экономика министрінің 2023 жылғы 21 қарашадағы №248 бұйрығына енгізілген.

ҚР премьер-министрінің орынбасары – ұлттық экономика министрінің 2026 жылғы 10 наурыздағы №75 бұйрығына сәйкес Екібастұз қаласы моноқалалар тізбесінен шығарылған.

Тізбені жаңарту мемлекет басшысының 2024 жылғы 2 қыркүйектегі Қазақстан халқына жолдауында айтылған тапсырмасын орындау үшін жүргізілген. Құжатта елдің басқа моноқалаларын дамыту үшін Саран қаласының экономикасын әртараптандырудың табысты тәжірибесін тарату міндеті қойылған.

Осы жұмыс шеңберінде Ұлттық экономика министрлігі моноқалалардың әлеуметтік-экономикалық дамуына өнеркәсіп өндірісінің серпіні, инвестициялық белсенділік, кәсіпкерлікті дамыту, жұмыспен қамту құрылымы және экономиканың орнықтылығының басқа да параметрлері секілді 78 негізгі көрсеткіш бойынша кешенді талдау жүргізген.

"Талдау нәтижесі бойынша, Екібастұз экономиканы әртараптандырудың тұрақты үрдісін, дамудың монопрофильді моделінен біртіндеп шығуды көрсетті. Қала экономикасы теңдестірілген салалық құрылыммен, өнеркәсіптің тұрақты өсуімен және жоғары инвестициялық белсенділікпен сипатталады.

Бүгінгі таңда Екібастұз еліміздің энергетика және металлургия саласында шешуші рөл атқаратын маңызды өнеркәсіп орталығы болып отыр. 2025 жылғы қорытынды бойынша қаладағы өнеркәсіп өндірісінің көлемі – 1 629,4 млрд теңге. Бұл 2024 жылғы сәйкес кезеңмен салыстырғанда 28,1 пайызға артық. Негізгі капиталға салынған инвестиция 429,8 млрд теңгеге жетіп, өткен жылғы көрсеткішпен салыстырғанда 1,2 есе өскен", - делінген хабарламада.

Министрліктің мәліметінше, халықты жұмыспен қамту экономиканың бірнеше секторы арасында бөлінген. Бұл бір қала құраушы кәсіпорынға тәуелділіктің төмендеуін және монофункционалдылық белгінің жоғалуын көрсетеді. Осыған байланысты, оң әлеуметтік-экономикалық көрсеткіштерді ескере отырып, Екібастұзды моноқалалар тізбесінен шығару туралы шешім қабылданған.

Жаңартылған бұйрықпен 19 моноқаланың тізбесі бекітілген: Абай, Ақсай, Ақсу, Алтай, Балқаш, Жаңаөзен, Жітіқара, Лисаковск, Қаражал, Кентау, Құлсары, Курчатов, Риддер, Рудный, Сәтбаев, Степногорск, Теміртау, Шахтинск және Хромтау. Осылайша, елдегі моноқала саны 20-дан 19-ға дейін қысқарып отыр.

Мәтіннен қате тапсаңыз, бізге жазыңыз