1 наурыздан бастап Қазақстанның кей өңірінде ауыр жүк көліктерінің қозғалысына шектеу енгізіледі

1 наурыздан бастап Қазақстанның сегіз өңірінде ауыр жүк көліктерінің қозғалысына шектеу енгізіледі. Уақытша шектеу шаралары 1 наурыздан 1 сәуірге дейін қолданылады. Бұл туралы Көлік министрлігінің баспасөз қызметіне сілтеме жасаған KAZ.NUR.KZ хабарлайды.

Ведомство өкілдерінің мәлімдеуінше, жыл сайын көктем мезгілінде республикалық маңызы бар жолдарды қыстан кейін сақтау және күтіп ұстау үшін бір оське жүктемесі 8 тоннадан асатын автокөлік құралдарының қозғалысын уақытша шектеу енгізіледі.

Бірінші наурыздан бастап мұндай ережелер 8 облыстағы трассаларда қолданылады.

Атап айтқанда, Алматы, Атырау, Жамбыл, Ұлытау, Қызылорда, Маңғыстау, Жетісу және Түркістан облыстары "Бесінші жол-климаттық аймаққа" кіреді.

"Шектеу шаралары жүктерді және жолаушыларды халықаралық тасымалдауды іске асыратын, төтенше жағдайлардың алдын алу және жою жөніндегі іс-шараларға тартылған, зардап шеккендерге гуманитарлық көмек, азық-түлік, багаж, дәрі-дәрмек тасымалдауды іске асыратын, сондай-ақ жол-құрылыс жұмыстарымен айналысатын автокөлік құралдарына қолданылмайды", - делінген хабарламада.

Мұндай шектеулер 23 наурыз бен 1 мамыр аралығында Ақмола, Ақтөбе, Абай, Шығыс Қазақстан, Батыс Қазақстан, Қарағанды, Қостанай, Павлодар және Солтүстік Қазақстан облыстарында да енгізіледі.

Мәтіннен қате тапсаңыз, бізге жазыңыз