Қазақстанда қай жолдарда орташа жылдамдықты арттырғаны үшін айыппұл салынады

Орташа жылдамдықты арттырғаны үшін айыппұл салу жол қозғалысының қауіпсіздігін қамтамасыз ету мақсатында енгізілген. Бірақ әзірге мұндай шара жолдардың бәрінде қолданыла бермейді. Бұл туралы KAZ.NUR. KZ материалынан оқыңыз.

4 желтоқсанда қалааралық жолдарда орташа жылдамдықты арттырғаны үшін айыппұл салуды көздейтін заң күшіне енді. Ереже бұзған қазақстандықтарға орташа жылдамдық түрлеріне қарай 5-40 АЕК (2024 жылғы есеппен 18 460 теңгеден 147 680 теңге аралығында) айыппұл төлейді.

Ал 2025 жылы Айлық есептік көрсеткішпен (3 932 теңге) бірге айыппұл көлемі де 19 660 теңгеден 157 280 теңгеге дейін артады.

Айыппұлдың мұндай түрі нақты қай уақытта және қай жолда салынатынын KAZ.NUR.KZ "ҚазАвтоЖол" ұлттық компаниясынан сұрастырып білді.

Орташа жылдамдық қалай есептеледі

Ұлттық компания мәліметінше, автокөліктің орташа жылдамдығы – республикалық маңызы бар жолдың жалпыға ортақ бөлігін автокөлік жүріп өткен уақытты бөлген кезде шығатын жылдамдық.

"Орташа жылдамдық қала сыртында айналма жолдары жоқ тура жолда автоматты түрде есептеледі. Ол үшін арнайы куәлігі бар бақылау-өлшеу құралдары пайдаланылады. Орташа жылдамдық автомобиль жолдарында белгіленген жылдамдықтан аспауға тиіс", - деп жауап берді "ҚазАвтоЖол".

Мысалы, жолдағы қозғалыс жылдамдығы сағатына 110 километрден аспауы керек болса, тура жолды одан артық жылдамдықпен жүріп өткен автокөлік иелеріне айыппұл салынады.

Мұндай айыппұл қай жолдарда салынады

Компания мәліметіне қарағанда, орташа жылдамдықты бақылау сынақ түрінде ақылы автожолдардың жалпы ұзақтығы 392 километр болатын үш бөлігіне енгізілген. Оларға мына жолдар жатады:

"Орал – РФ шекарасы (Самараға бара жатқан жол)" – "Самара – Шымкент" ақылы автожолының 56 км;

"Орал – РФ шекарасы (Озинки қалашығы)" – "Орал – Тасқала – РФ шекарасы (Озинки)" автожолының 99 км;

"Тараз – Қайнар" – "Алматы – Ташкент – Термез" автожолының 237 км.

Бұл ақылы жолдардың бойында орнатылған бейнекамералар Бірыңғай әкімшілік құқық бұзушылық тізіміне қосылған. Олар автокөліктер қозғалысының орташа жылдамдығын анықтайды.

"Болашақта осы бағдарламаны халықаралық және республикалық маңызы бар ақылы автожолдардың бәрінде сынақ түрінде қосу көзделіп отыр", - деп хабарлады "ҚазАвтоЖол" мамандары.

Мәтіннен қате тапсаңыз, бізге жазыңыз