"Алматы жастары" бағдарламасы бойынша өтінім қабылдау қашан басталатыны белгілі болды

"Алматы жастары" жеңілдетілген тұрғын үй бағдарламасына өтінім қабылдау 15 мамырда басталады, деп хабарлайды Алматы қаласы әкімдігінің Telegram-дағы ресми арнасында.

Қала әкімдігінің мәліметінше, "Алматы жастары" жеңілдетілген несие беру бағдарламасына 35 жасқа дейінгі жастар қатыса алады. Өтінім 31 мамырға дейін қабылданады.

Бағдарлама бойынша мұғалім, дәрігер, оқытушы, мәдениет және спорт саласының қызметкері және т.б. бюджеттік ұйымдардың сұранысқа ие мамандары несие алуға құқылы.

Сонымен қатар Алматы қаласының әкімі Ерболат Досаевтың тапсырмасы бойынша биыл жас мұғалімдер мен дәрігерлер үшін лимит тағы 100 займға ұлғайтылып отыр. Мұғалімдер үшін – 50, дәрігерлер үшін – 50.

Соның арқасында биыл 1100 жасты тұрғын үймен қамтамасыз ету жоспарланған.

Сондай-ақ төменде бағдарламаға қатысу шарттары көрсетілген.

Бағдарлама шарттары:

• қарыздың ең жоғары сомасы - 18 млн теңгеге дейін;
• пайыздық мөлшерлеме - 5%;
• бастапқы жарна - 10%;
• бастапқы және қайталама тұрғын үй сатып алуға болады.

Байқауға қатысу талаптары:

• Қазақстан азаматтығы;
• қатысушының жасы 35 жасқа дейін;
• үміткерде және оның отбасы мүшелерінің меншігінде тұрғын үйдің болмауы және соңғы 5 жыл ішінде тұрғын үй жағдайын әдейі нашарлату фактісінің болмауы;
• денсаулық сақтау, білім беру, мәдениет, спорт, ЖОО және ҒЗИ, журналистика, әлеуметтік сала және құқық қорғау органдарында кем дегенде соңғы 6 айда еңбек өтілі және міндетті зейнетақы аударымдары болуы керек.

Бағдарламаға қатысты анықтама телефоны: +7 (727) 225 14 57.

Мәтіннен қате тапсаңыз, бізге жазыңыз