Шымкентте "Жастар" бағдарламасына өтінім қабылдау басталды

Шымкент қаласы бойынша 35 жасқа дейінгі жұмыс істейтін жастарға арналған бағдарламаға өтінім қабылдау  басталды. Өтінім қабылдау  27 қараша күні сағат 9:00-ден  бастап 29 қараша сағат 19:00 аралығында жүргізіледі, деп хабарлайды Ontustiktv.kz.

Телеарна мәліметінше, "Жастар" бағдарламасына қатысушылар жұмыс істеп жүрген, 35 жасқа толмаған Қазақстан Республикасының азаматтары болуы керек. Олардың ай сайынғы табысы 40 айлық есептік көрсеткіштен, яғни 147 680 теңгеден кем болмауы қажет.

Өтініш берушінің Шымкент қаласында өтінім берер алдында соңғы 3 жылдан кем емес тұрақты тіркеуінің болуы шарт. Биыл жалдамалы пәтер талаптарына бірқатар өзгеріс енгізілген.

"Бұл тұрғын үйлер  3 жылға дейін беріледі Бірақ келісімшартқа бір жылға тұрамыз. Бір жылдың ішінде азаматтар 170 АЕК жинаған жағдайда келісімшарт әрі қарай созылады", - дейді Тұрғын үй басқармасының бөлім басшысы Жұлдызай Ордабекова.

Биыл аталған жоба аясында жастарға 900 баспана бөлініп отыр. Пәтерлер Шымкент қаласы, Абай және Қаратау аудандарында орналасқан. "Жастар" бағдарламасына қатысушылар kezekte.kz порталында ЭЦҚ кілті арқылы өтінім бере алады.

Мәтіннен қате тапсаңыз, бізге жазыңыз