Әйелдерге арналған "Ұмай" ипотекасы қашан іске қосылатыны белгілі болды

"Отбасы банк" басшысы Ләззат Ибрагимова үкіметте сейсенбіде өткен брифингте Қазақстанда әйелдерге арналған ипотека қашан іске қосылатыны туралы айтты. Бұл туралы KAZ.NUR.KZ хабарлайды.

"Биыл біз Азия даму банкімен келісімге отырдық. АДБ директорлар кеңесінде бағдарлама шартын бекітті. Біз ешқандай өзгеріс болмағанын – алғашқы салым 20 пайыз деңгейінде қалғанын қалаймыз. Баспананы бірінші және екінші санаттағы нарықтан алуға болады. Сыйақы мөлшері АДБ-ның ішкі қаржы нарығында теңге тарту көлеміне қарай белгіленеді", - дейді Ибрагимова.

Оның айтуынша, банктің халық үшін тартып жатқан ресурстары теңге түрінде болғаны маңызды.

"Жылдың екінші жартысында бастаймыз деп ойлаймын, бірақ одан бұрын іске қосамыз деп жоспарлағанбыз. Алайда біз осы несие бойынша жарна төмен болса екен деп отырмыз. Сол себепті ұтымды сәтті таңдап, ұтымды мөлшерлемені тартуға тырысамыз", - дейді ол.

Бұған қоса, "Отбасы банк" басшысы ипотекасы бар қазақстандықтардың доллардың күшеюіне байланысты баспана қымбаттай ма деген сауалға жауап берді. Оның айтуынша, "Наурыз" және "Отау" бағдарламаларына қатысушылар үшін ештеңе өзгерген жоқ.

Бұған дейін "Отбасы банк" тұрғын үй бағдарламасының бірі бойынша несие шарттарын қайта қарау жоспарын жариялаған.

Әйелдерге арналған "Ұмай" ипотекалық бағдарламасы іске қосылатыны биыл қыркүйек айында мәлім болған.