Тоқаев Еуропалық комиссия президенті Урсула фон дер Ляйенді Қазақстанға шақырды (видео)

Опубликовано:

Тоқаев пен Урсула фон дер Ляйен
Тоқаев пен Урсула фон дер Ляйен. Фото: t.me/bort_01

Мемлекет басшысы Қасым-Жомарт Тоқаев БҰҰ Бас Ассамблеясы 77-ші сессиясының аясында Еуропалық комиссия президенті Урсула фон дер Ляйенмен екіжақты келіссөз жүргізді, деп хабарлайды Борт N1 Telegram арнасы.

Тараптар Қазақстан мен Еуропалық Одақ арасындағы Кеңейтілген стратегиялық әріптестікті дамыту перспективаларын талқылады.

Қазақстан президентінің 2021 жылғы қараша айында Брюссельге ресми сапарының қорытындысы бойынша қол жеткізілген уағдаластықтарды іске асыру барысына ерекше назар аударылды. Атап айтқанда, энергетика және көлік-логистика салаларында бірлескен жобаларды жүзеге асыру мәселелері қозғалды.

Мемлекет басшысы Урсула фон дер Ляйенді әділетті Қазақстанды құруға бағытталған елімізде жүзеге асырылып жатқан ауқымды саяси және экономикалық реформалар туралы хабардар етті.

Тоқаев пен Урсула фон дер Ляйен стратегиялық серіктестікті одан әрі жан-жақты нығайтуға деген өзара қарым-қатынасты растады.

Еуропалық комиссияның президенті Қасым-Жомарт Тоқаевтың басшылығымен елімізде іске асырылып жатқан ауқымды реформаларды жоғары бағалады.

Кездесу соңында президент Урсула фон дер Ляйенді Қазақстанға ресми сапармен келуге шақырды.

Айта кетейік, бүгін Тоқаев БҰҰ Бас Ассамблеясы сессиясының Жалпы дебатында сөз сөйлейді.

Сондай-ақ президент Иордания Королі ІІ Абдалламен әңгімелесіп, Халықаралық Қызыл Крест комитетінің президентімен кездесті.

Мақаланың түпнұсқасы: https://kaz.nur.kz/politics/1988777-toqaev-europalyq-komissiya-prezidenti-ursula-fon-der-lyaiendi-qazaqstanga-saqyrdy-video/