Қазақстан жер сілкінісінен зардап шеккен Сирияға 50 тонна гуманитарлық көмек жібереді

Қазақстан үкіметі жер сілкінісінен зардап шеккен Сирияға 50 тонна гуманитарлық көмек жібереді. Бұл туралы үкіметтің баспасөз қызметі Telegram-дағы ресми арнасында хабарлады.

Үкіметтің баспасөз қызметінің хабарлауынша, 9 ақпанда үкімет үйінде премьер-министрдің бірінші орынбасары Роман Склярдың төрағалығымен Халықаралық гуманитарлық көмек мәселелері жөніндегі комиссияның отырысы өткен.

Онда жойқын жер сілкінісінен зардап шеккен Сирияға 50 тонна гуманитарлық көмек жіберу туралы шешім қабылданған.

Үкіметтің баспасөз қызметі Сирияға көмек ретінде мемлекеттік материалдық резервтен консервіленген өнімдер, жылы киім-кешек, қысқы шатырлар, кереуеттер мен төсек-орын жабдықтары жіберілетінін атап өтті.

Жүк Ислам ынтымақтастығы ұйымының желісі бойынша Алеппо қаласына төрт әуе рейсімен жеткізілмек.

Айта кетейік, бұған дейін мемлекет басшысы Қасым-Жомарт Тоқаев үкіметке жер сілкінісінен зардап шеккен Сирияға гуманитарлық көмек көрсетуді тапсырған еді.

Соңғы мәліметтер бойынша Түркия мен Сириядағы жер сілкінісі салдарынан қаза тапқандардың жалпы саны 20 мыңнан асқан.

Мәтіннен қате тапсаңыз, бізге жазыңыз