"Қазақша барлық сұрағыңызға жауап беремін": жаңа министр 6 айда қазақ тілін меңгеруге уәде берді

Таяуда тағайындалған Энергетика министрі Алмасадам Сәтқалиев үкімет кулуарында қазақ тілін меңгеруге алты ай уақыт сұрады, деп хабарлайды KAZ.NUR.KZ тілшісі.

Бүгінгі үкімет отырысынан кейін БАҚ өкілдері жаңа министрден Астанада жиналған жаңаөзендік жұмысшылардың алдына неге шықпағанын қазақ тілінде түсіндіруді сұраған.

Алмасадам Сәтқалиев бұл мәселе бойынша жауап бергенін мәлімдеген.

Алайда журналистер министрдің сұраққа қазақ тілінде жауап беруін талап еткен.

"Әрине, мен ана тілімді білемін. Бірақ маған тілді білу деңгейімді көтеру керек. Маған жарты жыл беріңіз. Сіздердің қазақша барлық сұрағыңызға жауап беретін боламын", - дейді Алмасадам Сәтқалиев.

Сондай-ақ министр жауап сапалы болуы үшін орыс тілінде сөйлейтінін атап өткен.

Айта кетейік, 4 сәуірде бұған дейін "Самұрық-Қазына" ұлттық әл-ауқат қоры" АҚ басқарма төрағасы қызметін атқарған Алмасадам Сәтқалиев Энергетика министрі болып, тағайындалды.

Бүгін ол үкімет отырысында ант берді.