Ақордада Эмомали Рахмонды салтанатты түрде қарсы алу рәсімі өтті (фото)

3 мамырда Қазақстанға мемлекеттік сапармен келген Тәжікстан президенті Эмомали Рахмонды Ақордада салтанатты түрде қарсы алу рәсімі өтті. Бұл туралы Қазақстан президентінің баспасөз қызметі Telegram-дағы ресми арнасында хабарлады.

"Ақорда" резиденциясында Тәжікстан Республикасының президенті Эмомали Рахмонды салтанатты түрде қарсы алу рәсімі өтті.

Құрмет қарауылының бастығы мемлекеттер басшыларына рапорт берді, сондай-ақ Қазақстан мен Тәжікстанның әнұрандары орындалды", - делінген хабарламада.

Айта кетейік, 3 мамырда Қазақстанға мемлекеттік сапармен келген Тәжікстан президентін Қасым-Жомарт Тоқаевтың өзі әуежайдан қарсы алған болатын.

Сапар аясында жоғары деңгейде екіжақты келіссөздер жүргізіледі және бірқатар маңызды құжатқа қол қойылады деп жоспарланып отыр.