"Жылы әңгіме болды": Италия премьер-министрі Тоқаевқа алғыс айтты

Кеше мемлекет басшысы Қасым-Жомарт Тоқаев Италия премьер-министрі Джорджа Мелонимен телефон арқылы сөйлесті. Бұл туралы Мелони Twitter-дегі ресми парақшасында айтты, деп хабарлайды KAZ.NUR.KZ.

"Рим мен Астана арасындағы екіжақты қарым-қатынастың керемет деңгейін және осы қатынасты одан әрі нығайтуға деген ортақ қызығушылыққа негізделген жылы әңгіме болды. Мен президент Тоқаевқа Эмилия-Романьядағы су тасқынынан зардап шеккендерге байланысты Италияға көңіл айтқаны үшін алғыс айтамын", - деп жазды Италия премьер-министрі Джорджа Мелони парақшасында.

Бұған дейін Ақордада 22 мамырда Италия премьер-министрі Джорджа Мелонидің Қазақстанға жұмыс сапарымен келетінін хабарлаған болатын.

Алайда кейінірек Джорджа Мелонидің Астанаға ұшпайтыны белгілі болды. Эмилия-Романья аймағындағы су тасқынына байланысты премьер-министр Қазақстанға мемлекеттік сапарын тоқтатуға мәжбүр болған.

Айта кетейік, бір күн бұрын президент Қасым-Жомарт Тоқаев Мелонимен телефон арқылы сөйлескен болатын. Әңгімелесу барысында мемлекет басшысы жойқын су тасқыны салдарынан адамдардың қаза болуына байланысты премьер-министрге және бүкіл Италия халқына көңіл айтқан еді.

Мақаланың түпнұсқасы: https://kaz.nur.kz/politics/2021831-zyly-angime-boldy-italiya-premer-ministri-toqaevqa-algys-aitty/