Бас прокуратура Францияның Әблязовты елден шығару ұйғарымына пікір білдірді

Шілде айының басында Мұхтар Әблязов оған Франциядан шығуға 30 күн уақыт берілгенін мәлімдеген еді. Еліміздің Бас прокуратурасы қолда бұл деректі растайтын немесе терістейтін мәлімет жоқ екенін мәлімдеді, деп хабарлайды "ҚазАқпарат".

"Қазақстан Республикасының Бас прокуратурасы Франция билігінің М.Әблязовты елден шығару туралы шешім қабылдады делінген ақпаратқа қатысты бұл деректі растайтын немесе терістейтін сенімді мәліметінің жоқ екендігін хабарлайды", – деп жауап берген ведомство агенттіктің ресми сауалына орай.

Агенттіктің жазуынша, Бас прокуратура шетелдік азаматтарды елден шығару мәселесі, олардың көші-қон заңнамасын сақтауы Француз республикасының ғана ішкі ісі екендігін атап өткен.

Мемлекеттік органның атап өтуінше, Мұхтар Әблязов ұйымдасқан қылмыстық топтың құрамында бірқатар ауыр және аса ауыр қылмыс жасағаны үшін Қазақстанның құқық қорғау органдары тарапынан іздеуде жүр.

Бас прокуратура өкілетті орган ретінде Әблязовты экстрадициялау бойынша қылмыстық процессуалдық заңнамада және халықаралық шарттарда көзделген шараларды қабылдап жатыр.

"Бұған қоса, Қазақстанның Қылмыстық процессуалдық кодексінің 201-бабы 1-тармағына сәйкес, аталған сотқа дейінгі тергеу, оның ішінде қылмыстық іс бойынша халықаралық құқықтық ынтымақтастыққа қатысты мәліметтер жария етуге жатпайды. Сондықтан сіздердің сауалдарыңызға қатысты жан-жақты ақпарат қазіргі уақытта берілмейді", – деп түсіндірген ведомстводан.