Қазақстанға мемлекеттік сапармен келген Си Цзиньпинді әуежайдан Тоқаевтың өзі күтіп алды

Астанаға Қытай Халық Республикасының төрағасы Си Цзиньпин мемлекеттік сапармен келді. Бұл туралы Ақордаға сілтеме жасаған KAZ.NUR.KZ хабарлайды.

Ақорданың Telegram-дағы ресми арнасында жарияланған ақпарат бойынша, президент Қасым-Жомарт Тоқаев Қазақстанға мемлекеттік сапармен келген ҚХР Төрағасы Си Цзиньпинді елорда әуежайында қарсы алды.

"Мәртебелі қонақты салтанатпен қарсы алу үшін әуежайда Құрмет қарауылы ротасы сап түзеп тұрды. Сондай-ақ Қазақстан мен Қытай халықтарының шынайы достығының белгісі ретінде балалар екі елдің жалауын желбіретіп, қошемет көрсетті. Балалар Төраға Си Цзиньпин бастаған ҚХР делегациясына ілтипат білдіріп, қытай тілінде ән шырқады", - делінген ресми хабарламада.

Сапар аясында жоғары деңгейде екіжақты келіссөздер жүргізіледі және бірқатар маңызды құжатқа қол қойылады деп жоспарланып отыр.

Еске салсақ, 2-4 шілде күндері Қасым-Жомарт Тоқаевтың шақыруымен Қытай Халық Республикасының төрағасы Си Цзиньпин Қазақстанға мемлекеттік сапармен келетінін жазған едік.

Қытай басшысы мемлекеттік сапары барысында Шанхай ынтымақтастық ұйымына мүше мемлекеттер басшылары кеңесінің 24-отырысына қатысады деп жоспарланған.

Сондай-ақ Қытай Халық Республикасының төрағасы Си Цзиньпин алдағы мемлекеттік сапары алдында Қазақстанның бұқаралық ақпарат құралдарына арнап мақала жазып, онда ресми Бейжің Астанаға қатысты қандай саясат ұстанатынын айтты.

Мәтіннен қате тапсаңыз, бізге жазыңыз