Ғалымжан Қойшыбаев Үкімет аппаратының басшысы болып қайта тағайындалды

Президент Қасым-Жомарт Тоқаевтың жарлығымен Ғалымжан Қойшыбаев Үкімет аппаратының басшысы болып тағайындалды, деп хабарлайды Ақорданың Telegram-арнасы.

"Мемлекет басшысының Жарлығымен Ғалымжан Тельманұлы Қойшыбаев Қазақстан Республикасы премьер-министрінің орынбасары – Үкімет аппаратының басшысы лауазымына тағайындалды", – делінген хабарламада.

Үкіметтің ресми сайтындағы мәліметке сүйенсек, Ғалымжан Тельманұлы Қойшыбаев 1968 жылы Қызылорда қаласында дүниеге келген. М.В. Ломоносов атындағы Мәскеу мемлекеттік университететін тәмамдаған.

1995 – 2004 жылдары Қазақстанның Ресей Федерациясындағы елшілігінің атташесі, үшінші хатшысы, бірінші хатшысы, кеңесшісі, кеңесші-уәкілі болып қызмет еткен.

2004 жылы Қазақстан Республикасының Ұжымдық қауіпсіздік туралы шарт ұйымының жанындағы өкілетті өкілі болған.

2004 – 2006 жылдары президент әкімшілігінің Бас инспекторы болды.

2006 – 2008 жылдары Сыртқы істер министрлігінің ерекше тапсырмалар жөніндегі елшісі болып қызмет етті.

2008 – 2012 жылдары Қазақстанның Литва Республикасындағы Төтенше және Өкілетті Елшісі, Қазақстанның Латвия Республикасындағы, Эстония Республикасындағы және Финляндия Республикасындағы Төтенше және Өкілетті Елшісі (қоса атқарушы) қызметін атқарды.

2012 – 2016 жылдары – Финляндия Республикасы мен Эстония Республикасындағы Төтенше және Өкілетті Елшісі (қоса атқарушы) болды.

2016 – 2019 жылдары Сыртқы істер министрінің орынбасары лауазымын атқарды.

2019 жылғы 18 қыркүйекте премьер-министр кеңсесінің басшысы болып тағайындалды.

2023 жылғы 4 қаңтарда премьер-министрдің орынбасары – Үкімет аппаратының басшысы болып тағайындалды.

Мәтіннен қате тапсаңыз, бізге жазыңыз