Тимур Құлыбаев Kazenergy төрағасы қызметінен кетті

Тимур Құлыбаев Kazenergy Қазақстан мұнай-газ және энергетика кешені ұйымдары қауымдастығының төрағасы қызметінен кетті. Бұл туралы KAZ.NUR.KZ тілшісі Kazenergy сайтына сілтеме жасап хабарлайды.

"Kazenergy Қазақстан мұнай-газ және энергетика кешені ұйымдары қауымдастығының төрағасы болып Мағзұм Мырзағалиев сайланды", - делінген сайт хабарында.

Бұл шешім 8 қарашада Алматы қаласында өткен Kazenergy кеңесінің отырысында шығарылғаны айтылады.

"Kazenergy Қазақстан мұнай-газ және энергетика кешені ұйымдарының қауымдастығы мұнай-газ саласындағы кәсіпкерлікті дамытуды қолдау мақсатында 2005 жылдың 2 қарашасында құрылды. Бүгінде қауымдастық мұнай-газ, электр энергетикасы және атом өнеркәсібі салаларындағы компанияларды біріктіреді. Қауымдастықтың мақсаты - әлемде және елімізде энергетикалық және экологиялық саясаттағы өзгермелі басымдықтар жағдайында ҚР энергетика саласының (мұнай-газ және электр энергетикасы) тұрақты және теңгерімді дамуына жәрдемдесу", - делінген сайтта.

Сондай-ақ қауымдастық төрағасының лауазымы қоғамдық жұмыс болып есептелетіні, оған жалақы төлеу қарастырылмағаны айтылады.

Еске салайық, бұған дейін Тимур Құлыбаев Ұлттық Олимпиада комитетінің президенті болып қайта сайланғаны хабарланған еді.

Мәтіннен қате тапсаңыз, бізге жазыңыз