Тоқаев: Қазақ тілін пайдаланып, саяси ойындар жүргізудің қажеті жоқ

Мемлекет басшысы Қасым-Жомарт Тоқаев Алматы облысы жұртшылығамен кездесуінде еліміздегі тіл саясатына тоқталды. Президент мемлекеттің қазақ тілін қолдау үшін тиісті шаралар қолданып жатқанын айтты, деп хабарлайды БОРТ N1 Telegram-каналы.

Қасым-Жомарт Тоқаев өз сөзінде көп тіл білудің артық етпейтінін жеткізді. Алайда президент ең алдымен жастарға ана тілі - қазақ тілін білудің маңызды екенін атап өтті.

"Әлем халықтарының жақсы қасиеттерін бойға сіңіріп, озық үрдістерін үйрену үшін тіл білу қажет. Бабаларымыз "Жеті жұрттың тілін біл, жеті түрлі ілім біл" деп айтқан. Шын мәнінде, жастар неше тіл білсе, алдынан сонша елдің есігі айқара ашылады. Бұл туған еліңнің мүддесіне қызмет ету үшін қажет. Дегенмен, ең алдымен, жастарымыз ана тілін – қазақ тілін білуі керек.

Ана тіліміз бірінші орында болып, бәріміз үшін негізгі басымдық болуы қажет. Солай болады да деп атап айтқым келеді. Жалпы, біз тіліміз дамымай жатыр деген ойдан арылуымыз керек. Тәуелсіздік кезеңінде оның мәртебесі биіктемесе, төмендеген жоқ. Қаншама ақпарат құралдары хабар таратады. Газет-журналдар, кітаптар шығып жатыр", - дейді ол.

Президенттің пікірінше, елімізде тілдік орта түбегейлі өзгерген.

"Қазақша сөйлейтін жастар көбейіп келе жатыр. Жалпы, тілдік орта түбегейлі өзгерді. Қазақ тілін білетін өзге ұлт өкілдері де аз емес. Соған сәйкес қазақша фильмдерге, әндерге және басқа да өнімдерге деген сұраныс жоғары. Мұның бәрі қазақ тілінің қолдану аясы жылдан-жылға кеңейіп келе жатқанын көрсетеді. Сондықтан, алаңдауға еш негіз жоқ.

Қазақ тілін пайдаланып, саяси ойындар жүргізудің қажеті жоқ. Осындай теріс түсініктер кейбір елдерді қасіретке ұшыратты. Мемлекет қазақ тілін қолдау үшін тиісті шаралар қолданып жатыр. Бұл бағыттағы жұмысты жалғастыра береміз", - дейді Қасым-Жомарт Тоқаев.

Мемлекет басшысы өз тілімізді өзіміз ұлықтауымыз керек екенін баса айтты.

"Бірақ, өзге тілден бас тартуға болмайды. "Өз тілің бірлік үшін, өзге тіл тірлік үшін" деген сөз бар. Біз тіл саясатын байыппен жүргізуіміз керек. Сонда ғана көздеген мақсатымызға жетеміз", - дейді президент.

Мәтіннен қате тапсаңыз, бізге жазыңыз