"Ұсыныс күйінде қалды": Берік Әбдіғалиұлы бірқатар облыс атауын қазақшалауға қатысты пікір білдірді

Ұлытау облысында өткен көшпелі баспасөз конференциясында өңір әкімі Берік Әбдіғалиұлы Қазақстанның кей облыстарының атауын қазақшалау туралы ұсынысына қатысты пікір білдірді, деп хабарлайды KAZ.NUR.KZ тілшісі.

Көшпелі баспасөз конференциясында БАҚ өкілі Берік Әбдіғалиұлына өзінің ақпан айында білдірген ұсынысын еске салды.

"Ақпан айының соңында сіз Қазақстанның бірқатар облысының атауын өзгерту туралы ұсыныс білдірген едіңіз. Мұнымен әріптестеріңіз онша келісе қоймады. Ал облыстағы қалалардың атауын қазақшалау ойыңызда жоқ па", - деп сұрақ қойды журналист әкімге.

Берік Әбдіғалиұлының сөзінше, бұл ұсынысын ол "Қазақ тілі" республикалық қоғамының төрағасы ретінде білдірген.

"Сіздер менің республикалық "Қазақ тілі" қоғамының жетекшісі екенімді білесіздер. Ғылыми конференциялардың бірінде мен өз ойымды білдірдім. Бұл менің жеке ойым. Бұл туралы мен бұған дейін де өзімнің қоғамдық жобаларымда айтқанмын. Менің ұсынысым сол ұсыныс күйінде қалды", - деді Берік Әбдіғалиұлы.

Мәтіннен қате тапсаңыз, бізге жазыңыз