Қазақстан Талибанды тыйым салынған ұйымдар тізімінен шығарады

Қазақстан Талибанды тыйым салынған ұйымдар тізімінен шығарады. Еліміздің Сыртқы істер министрлігінің өкілі мұндай шешімнің неліктен қабылданғанын түсіндірді, деп хабарлайды "ҚазАқпарат" ХАА.

СІМ ресми өкілі Айбек Смадияров Қазақстан өзектендіру мақсатында Қазақстанда тыйым салынған террористік ұйымдардың ұлттық тізіміне үнемі ревизия жүргізіп отыратынын атап өтті.

"Аталған үдеріс аясында БҰҰ тәжірибесіне сәйкес, "Талибан қозғалысын" тізімнен шығару туралы шешім қабылданды. БҰҰ Қауіпсіздік кеңесінің орындауға міндетті қарарларына сәйкес, "Талибан қозғалысы" БҰҰ Қауіпсіздік кеңесі террористік деп таныған ұйымдардың тізіміне кірмейді", - деп түсіндірді ол.

Айта кетейік, 2023 жылдың тамызында өткен қазақстандық-ауған форумы қарсаңында Талибанды Қазақстанның мойындауы туралы әңгіме қозғала бастаған, ол кезде бұл сұрақ СІМ өкілдеріне қойылған еді.

Талибанды Қазақстандағы тыйым салынған ұйымдар тізімінен шығару туралы мәселе халықаралық қоғамдастықта үйлестірілуі тиіс екендігі атап өтілген.

Еске салайық, 2005 жылы Қазақстанның Жоғарғы соты "Талибан" қозғалысын террористік деп танып, оның республика аумағындағы қызметіне тыйым салған. "Талибанға" ҰҚШҰ-ға кіретін басқа елдерде - Қырғызстанда, Ресейде, Тәжікстанда тыйым салынған.

Мәтіннен қате тапсаңыз, бізге жазыңыз