"Ұлтжанды азамат болды": Тоқаев мемлекет және қоғам қайраткері Өмірбек Байгелдінің отбасына көңіл айтты

Мемлекет басшысы Қасым-Жомарт Тоқаев мемлекет және қоғам қайраткері Өмірбек Байгелдінің отбасы мен жақын туыстарына көңіл айту жеделхатын жолдады. Бұл туралы Ақорда хабарлады.

Президент аса көрнекті мемлекет және қоғам қайраткері, парламент сенатының тұңғыш төрағасы, "Отан" орденінің иегері, академик Өмірбек Байгелдіұлының дүниеден өтуіне байланысты оның отбасы мен жақын туыстарына көңіл айтты.

"Өмірбек Байгелдіұлы егемендіктің берік іргетасын қаласқан тұғырлы тұлға, Отанымыздың дамуына қажырлы еңбек сіңірген ұлтжанды азамат болды. Қазақстан Республикасы парламентінің қалыптасуына зор үлес қосты. Ғибратты ғұмыр иесі өзінің нағыз парасатты тұлғаға тән қадір-қасиетімен барша жұрттың сый-құрметіне бөленді. Соңына жарқын із қалдырған Өмірбек Байгелдіұлының есімі мен бейнесі халқымыздың жадында мәңгі сақталады. Марқұмның иманы саламат, жаны жәннатта болсын", – деп жазылған жеделхатта.

Айта кетсек, бұған дейін Қазақстан парламенті сенатының тұңғыш спикері Өмірбек Байгелдінің дүниеден өткені хабарланған болатын.

Мәтіннен қате тапсаңыз, бізге жазыңыз