Қазақстанда курорттық зоналарда әуежайлар салынуы мүмкін

Қасым-Жомарт Тоқаев өз жолдауында Қазақстанның курорттық зоналарында әуежайлар салу қажет екенін айтты. Бұл туралы KAZ.NUR.KZ хабарлайды.

"Әуе хабтарын дамыту - өте маңызды міндет. Қазақстанның әуе кеңістігі арқылы жыл сайын 150 мың тоннаға жуық жүк тасымалданады. Алдағы төрт жылда бұл көрсеткішті екі есе ұлғайтуға болады. Әуежайларымыздың жүк тасымалдау мүмкіндігін арттыру үшін барлық жағдайды жасау керек. Ішкі әуе бағдарларын дамытуға айрықша назар аударған жөн. Бұл, әсіресе, негізгі туризм нысандарының инфрақұрылымын жақсарту үшін маңызды", - деді мемлекет басшысы.

Сонымен қатар президент Балқаш пен Алакөл демалыс аймақтарында ұшу-қону жолақтары толық жаңғыртылғанын жеткізді.

"Балқаш және Алакөл демалыс аймақтарындағы ұшу-қону жолақтары толық жаңғыртылды. Қатонқарағай, Зайсан және Кендірлі өңірлерінің де туристік әлеуетін дұрыс пайдалану қажет. Осындай демалыс аймақтарында сапасы жоғары жол инфрақұрылымы бар әуе бекеттері мен әуежайлар салу керек. Өнеркәсіпті дамыту қорының есебінен кіші авиация ұшақтарын алған жөн. Туризм жобаларын жүзеге асырғанда табиғатқа зиян келтірмей, экологияны сақтау барынша маңызды екенін ерекше атап өткім келеді", - деді Тоқаев.