"Саран қаласы әкімінің ақпараты шындыққа жанаспады": өңір басшысы жылыту маусымындағы олқылықтарға тоқталды

Қарағанды облысының тұрғындары жергілікті арнаның тікелей эфирінде өңір басшысы Ермағанбет Бөлекпаевқа сұрақтарын қойды. Облыс әкімі жылыту маусымындағы мәселелерге тоқталды, деп хабарлайды KAZ.NUR.KZ әкімдікке сілтеме жасап.

Әкім хабар қатысқан кезінде call-орталық операторлары 70-ке жуық қоңырау мен хабарламаларды қабылдады.

Мәселелердің басым бөлігі коммуналдық және әлеуметтік салаларға, жолдарға, абаттандыруға қатысты болды.

Ермағанбет Бөлекпаев Саранның орталық қазандығының жағдайын түсіндірді.

"Жаңа қазандық 13 жыл бойы салынды. Қазір іске қосу жұмыстары жүріп жатыр. Орталық қазандық 102 үйге жылу береді. Қазір жылу көзінде төрт қазандықтың екеуі жұмыс істеп тұр. Қазандықты іске қосу кезінде сорғы жабдықтарымен байланысты техникалық ақаулар болды. Жазда қала әкіміне сақтандыру үшін жергілікті қазандықтарды дайындау тапсырылды. Оның баяндамаларына сүйенсек, қосымша қазандықтар дайын болған. Бірақ ақпарат шындыққа жанаспады. Салдарынан бұл қазандықтар кейінірек іске қосылды", - деді облыс әкімі.

Ол Саран қаласында жылу мәселесі жеке бақылауда деп сендірді. Күн сайын облыс әкімінің бірінші орынбасары сол жерде барлығын қадағалап жүргенін, келіп түскен шағымдарды жедел шешуге тырысатынын айтты.

Мәтіннен қате тапсаңыз, бізге жазыңыз