"Сыраның да, көліктің де қатысы жоқ": депутат Жигули Дайрабаев есімінің құпиясын ашты

Мәжіліс депутаты Руслан Берденов депутат Жигули Дайрабаев есімінің мағынасын сұрады. Оның сыраға да, көлікке де еш қатысы жоқ болып шықты. Бұл туралы KAZ.NUR.KZ Massaget.kz сайтына сілтеме жасап хабарлайды.

"Көлік кейін 69-70 жылдары шықты ғой. Есімімді марқұм әкем қойып еді. Қазіргі Самара қаласының маңында, Ресейде Жигули деген тау бар. Қазақтар ырымшыл ғой. Сыраның да, көліктің де қатысы жоқ. Ырымдап, таудай болсын деп қойды. Әкеме де, есіміме де рақмет", - деп жауап берді депутат.

Бұған дейін депутат Жигули Дайрабаев мәжіліс отырысында туризм және спорт министрі Ербол Мырзабосыновқа Қазақстан футбол федерациясының жаңа басшысын сайлауға қатысты өтінішін айтқанын еске саламыз.

Министр Ербол Мырзабосынов депутаттың сұрағына жауап бере келе, қарастырылып жатқан заң жобасына сәйкес, алдағы уақытта легионерлер квазимемлекеттік сектордан қаржыландырылмайтынын айтты.