Шымкенттегі "Бозарық-3" шағынауданы көгілдір отынмен қамтылды

Бүгін Шымкент қаласының әкімі Ғабит Сыздықбеков Қаратау ауданында жергілікті тұрғындармен және QazaqGaz Aimaq АҚ басшылығымен бірге "Бозарық-3" шағынауданына табиғи газ қосу шарасына қатысты. Бұл шара шамамен 700 тұрғын үйдің табиғи газға қосылуына мүмкіндік береді, деп хабарлайды KAZ.NUR.KZ қала әкімдігінің баспасөз қызметіне сілтеме жасап.

Әкімдік мәліметінше, мегаполис басшысы тұрғындарды құттықтап, шағынауданды газдандыру халықтың өмір сүру сапасын арттыру жолындағы тағы бір маңызды қадам екенін атап өткен.

"Тұрғын алабын газдандыру Шымкент қаласы халқын табиғи газбен қамтамасыз ету туралы ауқымды бағдарламаның бір бөлігі болатын. Бұдан бөлек желтоқсан айында мұнда ауызсу мен электр энергиясымен қамту жұмыстарын аяқтауды жоспарлап отырмыз", - деді Ғабит Сыздықбеков.

Айта кетейік, биыл күзде "Қайнарбұлақ-"1, "Қаратөбе" және "Бозарық-2" тұрғын алаптарының тұрғындары да табиғи газға қосылу мүмкіндігіне ие болды. Жыл соңына дейін "Қайнарбұлақ-2", "Қайтпас-1", "Ынтымақ", "Тассай" және "Еламан" шағынаудандарына да газ жеткізіледі.

Мәтіннен қате тапсаңыз, бізге жазыңыз