Саясат

Зектілері

Тоқаев Талдықорғандағы аккумулятор шығаратын зауыт жұмысшыларымен кездесті (фото)

Жарияланған күні:

Талдықорғандағы іс-сапар
Мемлекет басшысы зауытта. Фото: Ақорда

Мемлекет басшысы Қасым-Жомарт Тоқаевтың Жетісу облысына жұмыс сапары "Талдықорған" индустриялық аймағында орналасқан өндірістік аккумулятор шығару зауытының жұмысымен танысудан басталды. Бұл туралы KAZ.NUR.KZ Ақордағы сілтеме жасап хабарлайды.

Жұмыс сапары барысында президентке өндіріс орнын таныстырған "ASMA INDUSTRIAL" ЖШС құрылтайшысы әрі зауыт директоры Серікбай Ажмағамбетовтің айтуынша, мұнда мұнай-газ, тау-кен өнеркәсібінде, телекоммуникацияда, теміржол саласында, сондай-ақ "жасыл" энергетикада үздіксіз энергия көзі ретінде қолданылатын өндірістік аккумулятор батареялары шығарылады.

Мемлекет басшысына баяндалған мәліметтерге сәйкес, зауыт толық қуатына шыққанда 180 жұмыс орны құрылып, жылына 210 мың аккумулятор өндіреді. Дайындалған өнімнің 60 пайызын ТМД және Балтық елдеріне экспорттап, қалған 40 пайызын отандық нарықта сатуды жоспарлап отыр. Сондай-ақ іске қосылған алғашқы жылы бюджетке 500 миллион теңгеден астам салық төлейді.

Қасым-Жомарт Тоқаев кәсіпорын жұмысшыларымен әңгімелесіп, еліміздегі өндірістің рөлі туралы айтты.

"Мемлекет мықты болсын десек, ең алдымен, өңірлеріміз қуатты болуы керек. Өндірісі дамыған елге айналу үшін осы салаға көңіл бөліп отырмыз. Стратегиялық маңызы бар Жетісу облысына ерекше назар аударамыз", - деді президент.

Зауытқа қажетті шикізаттың басым бөлігі Қазақстан кәсіпорындарынан сатып алынады. Атап айтқанда, "Казцинк" ЖШС-тен қорғасын, "Қазатомөнеркәсіп" ҰК" АҚ-дан күкірт қышқылын алса, сепаратор мен полипропиленді Қытайдан импорттайды.

Ресми ақпаратқа сәйкес, құны 8,5 миллиард теңгені құрайтын жоба былтыр қолға алынып, алдымен ғимараты жаңартылған. Бюджет қаражатына электр жабдықтары орнатылып, кәріз және газдандыру желілері тартылған. Аумағы 14,3 гектар болатын зауыт биылғы 6 желтоқсан күні іске қосылды.

Соңында мемлекет басшысы облыстағы кәсіпорындардың жетекшілерімен кездесіп, пікір алмасты. Сондай-ақ отандық бизнесті қолдау мемлекеттік саясаттың негізгі бағыты екенін жеткізді.

Мақаланың түпнұсқасы: https://kaz.nur.kz/politics/kazakhstan/2199732-toqaev-taldyqorgandagy-akkumuliator-shygaratyn-zauyt-zhumysshylarymen-kezdesti-foto/