Елімізде алғаш рет құрылыс және өнеркәсіп саласындағы құрметті атақтар табысталды (фото)

8 наурыз қарсаңында елімізде алғаш рет "Қазақстанның еңбек сіңірген құрылысшысы", "Қазақстанның еңбек сіңірген өнеркәсіп қайраткері" құрметті атақтары табысталды, деп хабарлайды Ақорда.

Ақорданың хабарлауынша, биыл марапаттар жүйесіне жаңадан енген 9 құрметті атақтың екеуі бүгін алғаш рет табысталды.

"Әлемдік додаларда топ жарып, еліміздің абыройын асқақтатып жүрген аруларымыз да бар.

Біз қажырлы еңбегімен, ерен ерлігімен танылған қыз-келіншектерді мақтан тұтамыз. Тәуелсіздік жылдары өз саласының үздігі атанған 8 әйелге "Қазақстанның Еңбек Ері" атағы берілді.

Биыл елімізде – "Жұмысшы мамандықтары жылы". Қазір осы саладағы білікті мамандардың мәртебесін көтеру үшін белсенді жұмыс жүргізіліп жатыр. Мысалы, мемлекеттік марапаттар жүйесіне жаңадан 9 құрметті атақ енгізілді. Бүгін осындай екі марапат алғаш рет тапсырылады.

"Қазақстанның еңбек сіңірген құрылысшысы" атағы еңбек ардагері Ольга Шелудькоға беріледі.

Ал өндіріс озаты Майра Ерманова "Қазақстанның еңбек сіңірген өнеркәсіп қайраткері" атанып отыр.

Осындай нағыз еңбек адамдарына бүкіл ел болып құрмет көрсетіп, оларды жан-жақты дәріптеуіміз керек. Жұмысшы мамандықтары жылының түпкі мәні де – осы", - деді президент.