"Тек оң нәтижелерді көрсеттіңіз": Бектенов QazaqGas басшысынан проблемалық мәселелерді көбірек айтуды сұрады

Бүгінгі үкімет отырысында Қазақстандағы газ саласын дамыту мен цифрландыру мәселелері қаралады. QazaqGas басшысының баяндамасын тыңдаған премьер-министр жұмыстағы оң нәтижені ғана емес проблемалық мәселелерді де айту қажеттігін жеткізді, деп хабарлайды KAZ.NUR.KZ.

Үкімет отырысында QazaqGaz ҰК АҚ басқарма төрағасы Санжар Жаркешов компания қызметіндегі негізгі жетістіктер, Шымкент қаласында газды есепке алуды цифрландырудың пилоттық жобасын енгізу нәтижелері туралы айтты.

Сондай-ақ ол газға қосылуға техникалық шарттарды алудың жаңартылған процесін, "Әлеуметтік әмиян" цифрлық құралы арқылы табиғи газға жеңілдіктер беру жөніндегі пилоттық жобаның нәтижелерін таныстырды.

Санжар Жаркешовтің баяндамасын тыңдаған премьер-министр саланың проблемалық мәселелеріне назар аударды.

"Жұмыстарыңызда ешқандай проблемалық мәселелер жоқ па? Жұмыстың тек оң нәтижелерін ғана көрсеттіңіз. Біз проблемалық мәселелер туралы көбірек айтуымыз керек, оларды жарыққа шығарып, талқылауымыз қажет", - деді Олжас Бектенов.

Санжар Жаркешов Қашаған МӨЗ-дегі ағымдағы жағдай туралы баяндады.

"Қашаған газ өңдеу зауытында проблемалар болды. Құрылыс жұмыстары баяу қарқынмен жүрді. Қазіргі уақытта жаңа бас мердігер келгендіктен құрылыс жұмыстары бойынша мәселелер 100 пайыз шешілді. Бүгінде құрылыс кеңейтілген. Қазір құрылыс жұмыстарын белгіленген мерзімде аяқтауды жоспарлап отырмыз", - деді ол.