Тоқаев Си Цзиньпинді 70 жасқа толған мерейтойымен құттықтады

Президент Қасым-Жомарт Тоқаев ҚХР төрағасы Си Цзиньпиннің 70 жасқа толған мерейтойына орай құттықтау жеделхатын жолдады. Бұл туралы Ақорданың ресми сайты хабарлады.

Жеделхатта Қасым-Жомарт Тоқаев Қытайдың саяси, әлеуметтік-экономикалық, мәдени-гуманитарлық салаларын дамытуға және халықаралық аренадағы жоғары беделін ілгерілетуге Си Цзиньпиннің қосқан жеке үлесін жоғары бағалаған.

Сондай-ақ мемлекет басшысы Қытай халқының игілігін қамтамасыз етуге бағытталған ҚХР төрағасының бастамалары мен ауқымды реформаларының табысты жүзеге асырылуына тілектестік білдірген.

Сонымен қатар президент Қазақстанның екі ел арасындағы жан-жақты стратегиялық серіктестік пен ынтымақтастықты нығайтуға ниетті екенін тағы да растаған.

"Біздің бірлескен күш-жігеріміз екі ел арасындағы ынтымақтастықты одан әрі нығайтуға және Қазақстан мен Қытай арасындағы көпжақты серіктестікті сапалы жаңа деңгейге шығаруға толық ықпал ететініне сенімдімін", – деп жазылған жеделхатта.

Мәтіннен қате тапсаңыз, бізге жазыңыз